قىتايلىق قالىڭدىق ۇيلەنۋ تويى بولاتىن كۇنى 50 جىلعا قارتايىپ كەتتى – فوتو، كەسكىن

استانا. قازاقپارات - قىتايدىڭ شەنچجەن قالاسىنىڭ تۇرعىندارى ەرەكشە ۇيلەنۋ تويىنىڭ كۋاگەرى بولدى.

قالىڭدىق كيىمىندەگى ەگدە ايەل مەن كۇيەۋ جىگىت كوشە ورتاسىندا ۇرىسىپ قالدى.

كەيىن كوشەدەگىلەر قالىڭدىقتىڭ ەگدە ايەل ەمەس، 20 جاستاعى قىز ەكەنىن ءبىلدى. ول گريم مەن جالعان شاش قويىپ، 70 جاستاعى ايەل وبرازىنا ەندى، - دەپ حابارلايدى Shanghaist.

قالىڭدىق قارتايعان كەزىندە دە كۇيەۋ جىگىتتىڭ وعان ادال بولاتىنىن تەكسەرەيىن دەپ ادەيى اجەگە اينالىپتى.

ءبىراق جىگىت ونىڭ بۇل ىسىنە بىردەن قارسى ەكەنىن ايتىپ، سول ارادا ماكياجى مەن جالعان شاشىن الىپ تاستاۋدى تالاپ ەتتى. بۇل بۇيرىعىنا كونبەگەن قىزعا جىگىت بوقتىق ءسوز ايتىپ، جىلاتىپ، كوشە ورتاسىنا تاستاپ كەتىپ قالدى.

جىگىتىنە مۇنداي سىناقتى نەلىكتەن جاساعانىن سۇراعان جۋرناليستەرگە قالىڭدىق كۇيەۋ جىگىتتىڭ "قىزقۇمار ەكەنىن جانە بۇعان دەيىن ونىڭ كوپ قىزبەن كوڭىل قوسقانىن" ايتتى. ال سونداي ادامعا نەلىكتەن تۇرمىس قۇرىپ جاتقانىن سۇراعاندا ول "ونىڭ قارىم- قاتىناسى جاقسى" بولدى دەپ جاۋاپ بەرگەن.

بۇل جۇپتىڭ ۇيلەنۋ-ۇيلەنبەۋى ازىرشە بەلگىسىز قالىپ وتىر. ءبىراق كەيبىر ب ا ق-تار مۇنىڭ شىنايى وقيعا ەمەس، جارناما ءۇشىن جاسالعان ارەكەت ەكەنىن جازىپ جاتىر.

Alashainasy.kz