يسپانيالىق سپورتشى ايەل 500 كۇنىن ۇڭگىردە وتكىزدى
بۇل جاڭا الەمدىك رەكورد بولۋى مۇمكىن، دەپ حابارلايدى قازاقپارات BBC-گە سىلتەمە جاساپ.
بەاتريس COVID-19 پاندەمياسى كەزىندە گراناداداعى ۇڭگىرگە تۇسكەن. بۇل عالىمداردىڭ باقىلاۋىندا بولعان ەكسپەريمەنتتىڭ ءبىر بولىگى.
«مەن ءالى دە 2021 -جىلدىڭ 21-قاراشاسىندا تۇرمىن. الەمدە نە بولىپ جاتقانىنان مۇلدە بەيحابارمىن»، - دەدى ول ۇڭگىردەن شىققاننان كەيىن.
ۇڭگىرگە 48 جاسىندا تۇسكەن بەاتريس فلاميني قازىر 50 جاستا. ول ەكى جىل تۋعان كۇنىن جالعىز اتاپ ءوتتى.
70 مەتر تەرەڭدىكتە وتكىزگەن 500 كۇن بويى ول سۋرەت سالىپ، باس كيىم توقىپ، كىتاپ وقۋمەن جانە دەنە شىنىقتىرۋمەن اينالىستى. ونىڭ قولداۋ توبى وسى ۋاقىت ىشىندە بەاتريستىڭ 60 كىتاپ وقىپ، 1000 ليتر سۋ ىشكەنىن حابارلادى.
سپورتشىنى قاشىقتان پسيحولوگتار مەن ۇڭگىرلەردى زەرتتەۋمەن اينالىساتىن ماماندار - سپەلەولوگتار باقىلاپ وتىردى. ءبىراق ولاردىڭ ەشقايسىسى ونىمەن تىكەلەي بايلانىستا بولعان جوق.
يسپاندىق RTVE تەلەارناسى بەاتريستىڭ ۇڭگىردەن كۇلىمسىرەپ شىعىپ، كومانداسىمەن كەزدەسۋ ءساتىن كورسەتتى. ول ءوزىن وتە جاقسى سەزىنەتىنىن ايتتى.
«مەن ءبىر جارىم جىل بويى ءوز-وزىممەن سويلەسۋمەن بولدىم. مەن تەپە-تەڭدىك ۇستاي الماي تۇرمىن، سول سەبەپتى مەنى جان-جاعىمنان ۇستاپ تۇر. قارسى بولماساڭىزدار، مەن ەڭ الدىمەن جۋىنىپ الايىن، ءبىر جارىم جىل بويى سۋعا قول تيگىزبەدىم، سودان كەيىن اڭگىمەلەسەمىز»، - دەدى بەاتريس جۋرناليستەرگە.
كەيىنىرەك بەاتريس فلاميني جۋرناليستەرگە ەكى ايدان كەيىن كۇن ساناۋدان جاڭىلىپ قالعانىن ايتتى.
«ءبىر كۇنى مەن كۇن ساناۋدى مۇلدە توقتاتتىم»، - دەگەن ول ۇڭگىردە 160-170 كۇن وتكىزدىم دەپ ويلاعان.
ونىڭ ايتۋىنشا، ەڭ جاعىمسىز ساتتەردىڭ ءبىرى - شىبىنداردىڭ شابۋىلى بولدى. سونىمەن قاتار ءتۇرلى دىبىستاردىڭ ەستىلۋى. «اينالا مۇلگىگەن تىنىشتىق، ال ەگەر ءوزىڭىز دە ءۇنسىز بولساڭىز، مي نەبىر دىبىستاردى ويلاپ تابا باستايدى»، - دەدى ول.
عالىمدار بۇل ەكسپەريمەنتتى الەۋمەتتىك وقشاۋلانۋدىڭ جانە ۋاقىتشا دەزوريەنتاتسيانىڭ ادامداردىڭ ۋاقىتتى قالاي قابىلدايتىنىنا اسەرىن زەرتتەۋ ءۇشىن پايدالاندى.
بەاتريس فلامينيدىڭ قولداۋ توبى ول ۇڭگىردە ۇزاق ۋاقىت وتكىزۋ بويىنشا الەم رەكوردىن جاڭارتقانىن حابارلادى.
2010 -جىلى رەكورد 688 م تەرەڭدىكتەگى جەر استىنداعى شاحتادا 69 كۇنگە قامالىپ قالعان چيليلىك جانە بوليۆيالىق 33 كەنشىگە بەرىلگەن بولاتىن.
