جامبىل وبلىسىندا سالماعى 500 كەلى بولاتىن اۋە بومباسى تابىلدى

تاراز. قازاقپارات - جامبىل وبلىسىنىڭ قۇقىق قورعاۋ ورگاندارى تاراز ماڭىنداعى قۇمدى ايماققا قاۋىپتى اۋە بومباسىنىڭ قالاي كەلگەنىن انىقتاپ جاتىر، دەپ حابارلايدى قازاقپارات ءتىلشىسى.

جامبىل وبلىسى پوليتسيا دەپارتامەنتىنىڭ الەۋمەتتىك جەلىدەگى رەسمي پاراقشاسىنا بايزاق اۋدانىنىڭ تۇرعىنىنان قۇمنان تابىلعان كۇدىكتى زات تۋرالى حابارلاما كەلىپ تۇسكەن.

دەپارتامەنتتىڭ باسپا ءسوز قىزمەتى حابارلاماعا دەرەۋ جاۋاپ بەرىپ، ونى بايزاق اۋداندىق پوليتسيا بولىمىندەگى ارىپتەستەرىنە تاپسىردى.

«پوليتسيا قىزمەتكەرلەرى وقيعا ورنىنا كەلىپ، اۆياتسيالىق سناريادقا ۇقساس زات تاپقان. سودان كەيىن وقيعا ورنىنا پوليتسيا دەپارتامەنتىنىڭ ساپەرلەرى، ت ج دەپارتامەنتىنىڭ ءورت سوندىرۋشىلەرى مەن قۇتقارۋشىلارى شاقىرىلدى»، - دەپ حابارلادى وبلىستىق پوليتسيا دەپارتامەنتى.

وقيعا ورنىنا كەلگەن ساپەرلەر سناريادتى زەرتتەپ، ونىڭ 1962-جىلى شىعارىلعان «ف ا ب 500م-62» اۆياتسيالىق بومباسى ەكەنىن ايتتى. ونىڭ سالماعى - 500 كەلى، ۇزىندىعى 2,5 مەترگە جەتەدى، ول كەز كەلگەن مينۋتتا 200 مەترگە دەيىن جارىلا الادى. بومبانى ودان ءارى زالالسىزداندىرۋ ءۇشىن ارنايى اسكەري تەحنيكاعا تيەپ، پوليگونعا الىپ كەتتى. «پوليتسياعا قاۋىپتى بومبا تۋرالى حابارلاعان ەر ادامدى ماراپاتتاۋ تۋرالى ۇسىنىس جاسالدى»، - دەيدى پوليتسيا دەپارتامەنتى.