ەلوردا اۋرۋحانالارىنا كۇنىنە 500 ادام تۇسەدى، ونىڭ تەڭ جارتىسىنان پنيەۆمونيا انىقتالادى
بۇل تۋرالى نۇر-سۇلتان قالالىق قوعامدىق دەنساۋلىق ساقتاۋ باسقارماسىنىڭ باسشىسى ساۋلە قيسىقوۆا ءمالىم ەتتى، دەپ حابارلايدى قازاقپارات ءتىلشىسى.
«17-ماۋسىمداعى جاعداي بويىنشا، ەلوردانىڭ جۇقپالى اۋرۋلار جانە ۋاقىتشا اۋرۋحانالارىندا 1711 ادام جاتىر. بۇل ءوز كەزەگىندە جالپى سىيىمدىلىقتىڭ 90 پايىزىن الىپ وتىر. ولاردىڭ ىشىندە 80 ادام رەانيماتسيا بولىمىندە، ال وكپەنى جاساندى جەلدەتۋگە قوسىلعان ناۋقاستار سانى 4 ەسە ءوستى. ولاردىڭ 91 پايىزى ورتاشا اۋىر دارەجەدە، 9 پايىزى اۋىر جانە وتە اۋىر جاعدايدا»، - س. قيسىقوۆا ورتالىق كوممۋنيكاتسيالار قىزمەتىندە. وسى ورايدا ول بۇل ناۋقاستار شۇعىل تۇردە جانساقتاۋ بولىمىنە تۇسەتىنىن ناقتىلادى.
«ەگەر جىل باسىندا كۇنىنە ورتا ەسەپپەن پنيەۆمونيامەن بەس ناۋقاس كەلىپ تۇسسە، ماۋسىم ايىنان باستاپ كۇن سايىن ورتاشا العاندا 500 ادامعا جۋىق كەلەدى. ونىڭ ىشىندە ءاربىر ەكىنشىسى ۆيرۋس پنيەۆمونياسىمەن جاتقىزىلادى»، - دەدى باسقارما باسشىسى.
بۇدان بۇرىن حابارلانعانداي، ەلوردادا 20 دان استام ۆيرۋسولوگ كوروناۆيرۋس جۇقتىردى. بۇرىن قالادا ءبىر عانا زەرتحانا بولسا، قازىر قالادا كۇنىنە 5 مىڭعا دەيىن تەست وتكىزەتىن 8 زەرتحانا بار. 17-ماۋسىمداعى جاعداي بويىنشا شامامەن 170 مىڭ تەست وتكىزىلدى. قازىر 40 مىڭنان استام تەست قولجەتىمدى.
اۆتور: رۋسلان عابباسوۆ
