قازاقستاندا 500 دەن استام ادام پارا بەرگەنى ءۇشىن سوتتالعان
نۇر-سۇلتان. قازاقپارات - سوڭعى 3 جىلدا ەلىمىزدە پارا بەرگەنى ءۇشىن 586 ادام سوتتالدى.
بۇل تۋرالى ق ر سىبايلاس جەمقورلىققا قارسى ءىس- قيمىل اگەنتتىگىنىڭ اپپارات باسشىسى قۋانىش جاپاقوۆ ونلاين- بريفينگ بارىسىندا ايتتى، دەپ حابارلايدى قازاقپارات ءتىلشىسى.
ونىڭ اتاپ وتۋىنشە، 2017-2019 -جىلدارى جانە وسى جىلدىڭ 3 ايىندا سىبايلاس جەمقورلىققا قارسى قىزمەت پارا بەرۋ فاكتىسى بويىنشا 915 قىلمىستى تىركەدى. سوڭعى 3 جىلداعى ديناميكا پارا بەرۋشىلەرگە قاتىستى قىلمىستاردى تىركەۋ فاكتىلەرىنىڭ وسكەندىگىن ايعاقتايدى.
ناقتى ايتقاندا، 2017 -جىلى - 255، 2018 -جىلى - 232، 2019 -جىلى - 342، ال وسى جىلدىڭ 3 ايىندا عانا 86 فاكتى تىركەلىپ وتىر. «پارا بەرگەنى ءۇشىن 586 ادام سوتتالدى (2017 -جىلى - 165، 2018 -جىلى - 198، 2019 -جىلى - 187، وسى جىلدىڭ 3 ايىندا - 36). ونىڭ ىشىندە 147 ادامدى باس بوستاندىعىنان ايىرۋعا ۇكىم شىعارىلدى. 352 ادامعا ايىپپۇل سالىنىپ، 65 ادامعا قاتىستى باس بوستاندىعىن شەكتەۋ قولدانىلدى»، - دەدى ق. جاپاقوۆ.
اپپارات باسشىسىنىڭ ايتۋىنشا، سوتتالعاندار ءومىر بويى مەملەكەتتىك قىزمەتتە جانە جەرگىلىكتى ءوزىن- ءوزى باسقارۋ ورگاندارىندا لاۋازىم اتقارۋ قۇقىعىنان ايىرىلعان.
«تالداۋ كوپ جاعدايدا جەكە كومپانيا وكىلدەرى پارا بەرۋشى بولاتىندىعىن كورسەتىپ وتىر. ولار كاسىپكەرلىك قىزمەتتى قولايلى جۇزەگە اسىرۋ نەمەسە مەملەكەتتىك ساتىپ الۋ شارتتارى بويىنشا ورىندالعان جۇمىستاردىڭ اكتىلەرىنە كەدەرگىسىز قول قويۋ ماسەلەلەرىن لاۋازىمدى تۇلعالاردى پارامەن ساتىپ الۋ ارقىلى شەشەدى»، - دەدى ول.
مىسالى، 2019 -جىلى قازان ايىندا «گرەنادا» ج ش س ديرەكتورى ا. گرومچەنكو قوستاناي وبلىسى اۋليەكول اۋدانىنىڭ اكىمى ا. قيسىقوۆقا ورتا مەكتەپتىڭ عيماراتىن كۇردەلى جوندەۋ بويىنشا ورىندالعان جۇمىستاردىڭ اكتىلەرىن كەدەرگىسىز قابىلداۋ ءۇشىن 7 ميلليون تەڭگە سوماسىندا پارا بەرگەنى ءۇشىن باس بوستاندىعىنان ايىرىلعان.
