اقتوبەلىك دزيۋدوشى وبلىس اكىمىنەن 500 مىڭ تەڭگە الدى

 ول باگام ارالىندا وتكەن جارىستا جاستار اراسىنان ەل نامىسىن قورعادى، دەپ حابارلايدى قازاقپارات ءتىلشىسى.

اقتوبە وبلىسىنىڭ اكىمى بەردىبەك ساپاربايەۆ دزيۋدوشى جانبولات باعىتبەرگەنوۆپەن كەزدەستى. ول قازان ايىندا ناسساۋ (باگام ارالى) قالاسىندا وتكەن جاستار اراسىنداعى دزيۋدودان الەم چەمپيوناتىندا قولا مەدال الدى. بۇل الەم چەمپيوناتىنا قاتىسقان قازاقستاندىقتاردىڭ جالعىز جۇلدەسى بولدى. ءارى اقتوبە وبلىسىنىڭ جاستارى اراسىنداعى دزيۋدونىڭ تاريحىندا العاشقى مەدال وسى. بىرىنشىلىككە بارلىعى 79 ەلدەن كەلگەن 492 سپورتشى قاتىسقان ەدى.

«بۇل قازاقستان ءۇشىن، اتاپ ايتقاندا اقتوبە ءۇشىن ۇلكەن جەڭىس. سەن ءالى جاسسىڭ. نەبارى جيىرماداسىڭ، ياعني، سپورتتىق مانسابىڭداعى الار اسۋىڭ ءالى الدا. باستىسى ەرىنبەي، وزىڭە كۇش- جىگەر جۇمساپ، شەبەرلىگىڭدى شىڭداۋعا كوڭىل ءبولۋ كەرەك. وعان قوسا، كەلە جاتقان جىل - ليسەنزيالىق. سوندىقتان توكيودا وتەتىن وليمپيادا ويىندارىندا سەنىڭ دە قاتىساتىنىڭا سەنەمىز» ، - دەدى بەردىبەك ساپاربايەۆ.

ءوڭىر باسشىسى، سونداي- اق، سپورتشىعا وبلىستىق دزيۋدو فەدەراتسياسى اتىنان 500 مىڭ تەڭگە كولەمىندەگى اقشالاي سىياقىنىڭ سەرتيفيكاتىن تابىس ەتتى. ءوز كەزەگىندە جانبولات باعىتبەرگەنوۆ العىس ايتىپ، جوعارى ناتيجەگە قول جەتكىزۋ ءۇشىن ءارى قاراي دا بار كۇشىن سالاتىنىنا ۋادە بەردى.