الماتىدا «بالبىراۋىن» كۇيىن ءبىر مەزەتتە 500 دومبىراشى ورىندادى

الماتى. قازاقپارات - الماتىدا ۇلتتىق دومبىرا كۇنىنە وراي ءبىر مەزەتتە 500 دومبىراشى قۇرمانعازىنىڭ «بالبىراۋىن» كۇيىن ورىندادى. بۇل مەرەكەگە ارنايى جاسالعان تارتۋ بولاتىن، دەپ حابارلايدى قازاقپارات ءتىلشىسى.

اربات الاڭىندا اشىق اسپان استىنداعى سالتاناتقا جۇزدەگەن ادام دومبىراسىن ارقالاپ كەلدى. «سازگەن سازى»، الاتاۋ ءداستۇرلى ونەر تەاترىنىڭ فولكلورلىق-ەتنوگرافيالىق ءانسامبلى، قازاقستان رەسپۋبليكاسى ۇلتتىق ۇلانى «وڭتۇستىك» وڭىرلىك قولباسشىلىعىنىڭ ساربازدارى مەن مەكتەپ وقۋشىلارى ءبىر مەزەتتە قۇرمانعازىنىڭ ايگىلى «بالبىراۋىن»، «اداي» كۇيلەرىن، نۇرعيسا تىلەنديەۆتىڭ «اتا تولعاۋىن» ورىنداۋدان «فلەشموب» ۇيىمداستىردى.

«قازاقتىڭ اتىن تانىتاتىن دومبىراعا ەلباسىمىز كۇن ارناپ، ونى ۇلىقتاۋدامىز. ەكى ىشەكتەن تۇراتىن وسىناۋ اسپاپتا تەك حالىق كۇيلەرىن عانا ەمەس، موتسارتتىڭ، شوپەننىڭ جانە باسقا دا ۇلتتاردىڭ تۋىندىلارىن ويناۋعا بولادى»، - دەدى «الاتاۋ» ءداستۇرلى ونەر تەاترىنىڭ ديرەكتورى بەرىك ءجۇسىپوۆ.

سونداي-اق بۇل كۇنى الماتى تۇرعىندارى مەن قوناقتارى ءۇشىن دومبىرادا ويناۋ مەن ونى جاساۋدان شەبەرلىك ساباقتارى ۇيىمداستىرلىپ، دومبىراشىلاردىڭ فوتوكورمەسى مەن ساندىك-قولدانبالى ونەر جارمەڭكەسى ءوتتى. كورەرمەندەر اراسىندا دومبىرادا ويناۋدان سايىس وتكىزىلىپ، مۋزىكالىق ۆيكتورينالار ويناتىلدى.

اۆتور: ارايلىم جولداسباي