سەمەيدە 500 ادام كۇيدەن شاشۋ شاشتى
سەمەيدە ۇلتتىق دومبىرا كۇنىنە وراي قالا اكىمى ەرماك ءسالىموۆتىڭ قاتىسۋىمەن ەرەكشە شارا ءوتتى. ءبىر مەزگىلدە 500 ادام كۇي تارتقان دومبىرا فەستيۆالىندە قۇرمانعازى مەن دينانىڭ، تاتتىمبەتتىڭ كۇيلەرى ورىندالدى.
سونداي- اق ەرتىس جاعالاۋىندا اباي اتىنداعى كىتاپحانا مەن ورتالىقتاندىرىلعان كىتاپحانا جۇيەسى بىرىگىپ «كيەلى دومبىرا ءۇنى» اتتى كورمە ۇيىمداستىردى. كۇيشىلەر اراسىندا دومبىرا- party سايىسى ۇيىمداستىرىلدى. قالاداعى ءا. قاشاۋبايەۆ اتىنداعى فيلارمونيا، اباي تەاترى مەن داريعا- اي جاستار تەاترىنىڭ ۇجىمدارى، م. تولەبايەۆ اتىنداعى مۋزىكالىق كوللەدج ستۋدەنتتەرى بىرىگىپ، كۇي شەرتتى.
«ناعىز قازاق قازاق ەمەس، ناعىز قازاق - دومبىرا» دەپ اقىندار جىرلاعانداي بۇل دومبىرانىڭ ۇنىندە ەلىمىز اڭساعان بوستاندىق، قازىرگى بەيبىت تىرلىك، بارلىعى ۇندەسىپ جاتىر. مەرەكەلەرىڭىز قۇتتى بولسىن!»، - قالا اكىمى.
بۇدان كەيىن ەرماك ءسالىموۆ قالاداعى №1 پەرزەنتحانادا بولىپ، وسىناۋ مەرەيلى كۇنى بوسانىپ، ومىرگە ۇل اكەلگەن گۇلجانات نۇرتازيناعا دومبىرانى سىيعا تارتتى.
ءدال وسىنداي شارا قالانىڭ تاعى ءبىر پەرزەنتحاناسىندا بولدى. قالالىق دوستىق ءۇيىنىڭ ديرەكتورى بەرىك كوپبايەۆ جاڭادان دۇنيە ەسىگىن اشقان شاقالاققا دومبىرا تارتۋ ەتتى.
