شىمكەنتتە 500 ونەرپاز قاتىسقان فلەشموب ءوتتى
قالانىڭ وقۋشىلار سارايىندا ۇيىمداستىرىلعان شارادا 50 بارابانشى ءوز ونەرلەرىن كورسەتىپ، 50 كۇيشى قۇرمانعازىنىڭ «بالبىراۋىن» كۇيىن ورىندادى، دەپ حابارلايدى قازاقپارات ءتىلشىسى.
فەستيۆال بارىسىندا 500 ونەرپاز «رۋحاني جاڭعىرۋ» فلەشموبىن ۇيىمداستىردى. شارا اياسىندا شىم شاھارداعى مادەنيەت ۇيلەرى مەن كلۋبتاردا قولونەر جانە قىلقالام شەبەرلەرى ۇيىرمەلەرىنىڭ كورمەسى ءوتتى. وندا قولدان جاسالعان بۇيىمدار كوپشىلىك نازارىنا ۇسىنىلىپ، جۇرتتىڭ قىزىعۋشىلىعىن تۋدىردى.
ال، ءتۇرلى جانرلار بويىنشا ۇيىرمە قاتىسۋشىلارىنىڭ گالا-كونسەرتىندە «جەرۇيىق» قويىلىمى ساحنالانىپ، تاريح بەتتەرىنەن سىر شەرتتى. جەرگىلىكتى ونەرپازدار تۋعان جەر قاسيەتىن دارىپتەيتىن جانە استانانىڭ 20 جىلدىعىنا ارناپ اندەر شىرقادى.
ايتا كەتەيىك، اعىمداعى جىلدىڭ 9-ساۋىرىنەن باستاپ وبلىستىق مادەنيەت جانە تىلدەردى دامىتۋ باسقارماسى مەن مادەنيەت جانە حالىق شىعارماشىلىعى ورتالىعىنىڭ ۇيىمداستىرۋىمەن ءوڭىردىڭ اۋدان، قالالارىندا «نۇرلى جول-بولاشاققا باستار جول» فەستيۆالى وتۋدە.
جەرگىلىكتى مادەنيەت ۇيلەرى مەن كلۋبتاردىڭ حالىققا زاماناۋي مادەني قىزمەت كورسەتۋ شارالارىن جاقسارتۋ مەن ونداعى جۇمىس ساپاسىن ارتتىرۋ ماقساتىندا ۇيىمداستىرىلعان شارا بىرنەشە قالا مەن اۋدانداردا ۇيىمداستىرىلدى.
