الماتى وبلىسىندا 500 ادام جۇمىس ىستەيتىن ءىرى زاۋىت ىسكە قوسىلادى
بۇل تۋرالى بۇگىن الماتى وبلىسىنىڭ اكىمى اماندىق باتالوۆتىڭ «ماريەۆەن فۋد حولدينگس» حولدينگىنىڭ وكىلدەرىمەن كەزدەسۋى بارىسىندا بەلگىلى بولدى، دەپ حابارلايدى قازاقپارات ءتىلشىسى.
كەزدەسۋ بارىسىندا ينۆەستورلار جوبانىڭ جۇزەگە اسىرىلۋ بارىسى، جەرگىلىكتى اتقارۋشى ورگانمەن بىرلەسىپ شەشۋگە ءتيىس ءبىرقاتار ماسەلەلەر تۋرالى باياندادى.
«ماريەۆەن فۋد حولدينگس» حولدينگىنىڭ اتقارۋشى ديرەكتورى ميشەل چانگتىڭ ايتۋىنشا، قازىرگى كەزدە زاۋىتتىڭ وندىرىستىك جانە ينجەنەرلىك كەشەنى دايىن، ىشكى ينجەنەرلىك كوممۋنيكاتسياسى تولىعىمەن جۇرگىزىلگەن. قاجەتتى قۇرال- جابدىقتار ساتىپ الىنىپ، قويمادا ساقتاۋلى. 1-تەستىلىك جەلى ءساۋىر ايىندا ىسكە قوسىلىپ، العاشقى ءونىم شىعارىلادى. زاۋىت نارىققا كاسىپورىن ىسكە تولىق قوسىلعاننان كەيىن شىقپاق. زاۋىتتىڭ ماۋسىم ايىنىڭ سوڭىندا اشىلادى دەپ جوسپارلانعان.
كەزدەسۋدە ايتىلعانداي، 2018 -جىلعا 24 ميلليارد تەڭگە بولاتىن ساتىلىم كولەمى بەلگىلەنىپ وتىر. زاۋىت تەز پىسەتىن كەسپە، سورپا دامدەۋىشتەرى، ماكاروندار - جالپى سانى 15 ءتۇرلى ءونىم شىعاراتىن بولادى. دايىن ءونىمنىڭ % 70 - ى كورشىلەس بەس ەلگە شىعارىلادى. ءوندىرىس بارىسىندا 5 ءونىم - ۇن، تۇز، كارتون جانە باسقا دا قازاقستاندىق ونىمدەر قولدانىلادى. كاسىپورىن 500 ادامدى تۇراقتى جۇمىس ورنىمەن قامتيدى، ونىڭ % 90 ءىن جەرگىلىكتى تۇرعىندار قۇرايدى. ينۆەستورلار زاۋىتقا كىرە بەرىسكە دەيىن جول توسەۋ، تەمىر جولعا شىعاتىن مۇمكىندىك جاساۋ قاجەتتىلىكتەرىن ايتتى. وبلىس اكىمى اماندىق باتالوۆ بۇل ماسەلەلەردى شەشۋدى باقىلاۋىنا الاتىنىن جەتكىزدى.
وبلىس اكىمىنىڭ ورىنباسارى جەڭىس تۇياقوۆتىڭ ايتۋىنشا، قيىرشىق تاس- قۇم توسەلەتىن جولدىڭ قۇرىلىسى ناۋرىزدا اياقتالسا، اۋا رايىنىڭ قولايلىلىعىنا قاراي ءساۋىر- مامىر ايلارىندا اسفالت توسەلەتىن بولادى. تەمىر جول ماسەلەسى دە جىل سوڭىنا دەيىن شەشىمىن تاپپاق. زاۋىت قاپشاعاي قالاسىنداعى گاز جەلىسىنە قوسىلادى.
«ءبىزدىڭ وبلىستىڭ اۋماعىندا وسىنداي ءىرى ينۆەستيتسيالىق جوبانىڭ جۇزەگە اسىرىلىپ جاتقانىنا قۋانىشتىمىن. بۇل كاسىپورىن ءوز كەزەگىندە وبلىستىڭ ازىق- تۇلىك وندىرىسىنە ءوزىنىڭ ۇلكەن ۇلەسىن قوساتىن بولادى. ەڭ باستىسى، زاۋىت 500 تۇراقتى جۇمىس ورنىن قۇرا وتىرىپ، جەرگىلىكتى تۇرعىنداردى جۇمىسپەن قامتيدى. وعان قوسا ءونىم ءوزىمىزدىڭ وتاندىق ۇننان دايىندالىپ، دايىن ءونىم «قازاقستاندا جاسالعان» دەگەن بەلگىمەن ەكسپورتقا شىعارىلاتىن بولادى»، - دەدى كەزدەسۋدى قورىتىندىلاعان وبلىس اكىمى ا. باتالوۆ.
اۆتور: سامال قابىشيەۆا
