قازاقستاندا قۇراستىرىلاتىن 500 كومباين بەلارۋسكە جونەلتىلەدى

قوستاناي. قازاقپارات - شەتەلدىك كاسىپورىنداردىڭ قوستانايلىق اۋىلشارۋاشىلىق تەحنيكالارىنا سۇرانىسى مول. بۇل تۋرالى وبلىستىق ەكونوميكا جانە بيۋدجەتتى جوسپارلاۋ باسقارماسىنىڭ باسشىسى ەرلان سپانوۆ ءمالىم ەتتى،

 دەپ حابارلايدى قازاقپارات ءتىلشىسى.

 2018 - جىلدىڭ باسىندا قازاقستاننان بەلارۋس رەسپۋبليكاسىنا 500 كومباين جونەلتىلەدى. بۇل ەكىجاقتى تاراپتىڭ كەلىسىمى ارقىلى جۇزەگە اسىرىلىپ وتىر. «بيىل كولىك قۇراستىرۋعا 67,5 ميلليارد تەڭگە ءبولىندى. قارجىنىڭ 23,4 پايىزى وڭدەۋ سەكتورىنا جۇمسالدى. بۇل كورسەتكىش 2016 - جىلى نەبارى 12,9 پايىز بولعان. قوستانايلىق مامانداردىڭ قاتىسۋىمەن بارلىعى 3,5 مىڭ جەڭىل اۆتوكولىك شىعارىلدى. بۇعان قوسا 296 IVECO اۆتوبۋسى ساتىلىمعا شىقتى»، - دەدى ەرلان سپانوۆ.

باسقارما باسشىسىنىڭ ايتۋىنشا، مەملەكەتتىك ساتىپ الۋ كونكۋرستارى مەن مەملەكەتتىك- جەكەشەلىك ارىپتەستىك اياسىنداعى جوبالاردى جۇزەگە اسىرۋ ناتيجەسىندە ارتىلعان 2 ميلليارد 123 ميلليون تەڭگە الەۋمەتتىك سالاداعى ءبىراز ماسەلەنى شەشۋگە سەپتىگىن تيگىزەدى. ماسەلەن، ۇنەمدەلگەن قاراجاتتىڭ باسىم بولىگى، ياعني 1 ميلليارد 69 ميلليون تەڭگە ورتالىق ستاديوننىڭ كۇردەلى جوندەلۋىنە، ال 500 ملن تەڭگە ءۇش اكىمشىلىك عيماراتتى رەتكە كەلتىرۋگە جاراتىلادى. سونداي- اق، پوليتسەيلەرگە ارنالعان پورتاتيۆتى بەينەباقىلاۋ قۇرىلعىلارىن ساتىپ الۋعا 249 ميلليون تەڭگە جوسپارلانعان. ۇنەمدەلگەن قاراجاتتىڭ ءبىراز بولىگى « يۋبيلەينىي» شاعىن ۋدانىندا سالىناتىن تۇرعىن ۇيلەردىڭ سمەتالىق- جوبالىق قۇجاتتارىنا كەتەدى. ارتىلعان قاراجات تۇرعىن ۇيلەردىڭ ينجەنەرلىك- كوممۋنيكاتسيالىق جۇيەلەرىن جاڭارتۋعا دا جۇمسالماق.

 اۆتور: باتىر جولاي ۇلى