اقتاۋلىق شەبەر 500-دەن اسا دومبىرا جاساعان

استانا. قازاقپارات - اقتاۋلىق شەبەر نۇرجان مۇسايەۆ اتا كاسىپتى دارىپتەپ ءجۇر. ون ساۋساعىنان ونەر تامعان ىسمەردىڭ قولىنان شىققان دومبىراعا باتىس وڭىرلەرى كۇيشىلەرىنىڭ ىقىلاسى ەرەكشە.

نۇرمۇقان جانتورين اتىنداعى وبلىستىق مۋزىكالىق دراما تەاترىنىڭ بەلدى ءارتىسى 500-دەن اسا ۇلتتىق اسپاپتى جاساعان. قوس ىشەكتى دومبىرانىڭ تابيعي قالپىن ساقتاپ، شابىتپەن جاسايتىن ەڭبەگى ەسكەرۋسىز قالىپ جاتقان جوق. بيىل اتىراۋدا وتكەن ايماقتىق «ۇكىلى دومبىرا» سايىسىندا باس جۇلدەنى جەڭىپ الدى.

نۇرجان ساحنالىق قويىلىمدارعا دايىندىقتان قولى بوساسا، تەاتر جەرتولەسىندەگى شاعىن شەبەرحاناسىنا اسىعادى. 15 جاسىنان باستاعان ءىسى قازىردە سۇيىكتى كاسىبىنە اينالعان. ايتۋىنشا ءداستۇرلى ءان، تەرمەدەن بولەك، توكپە، شەرتپە كۇيگە ارنالعان دومبىرالاردى جاساۋعا ون كۇننەن جارتى جىلعا دەيىن ۋاقىت قاجەت. ايگىلى اعاش ۇستاسى سۇلتان اعاسىنىڭ ءىزىن جالعاعان نۇرجاننىڭ ەڭ العاشقى ەڭبەگى اكەسىنىڭ سىنعان دومبىراسى ەكەن.

نۇرجان مۇسايەۆ، دومبىرا جاساۋشى شەبەر:

 - دومبىراسى سىنىپ قالدى، بىرەۋ باسىپ كەتتى مە، موينى سىنىپ قالدى. سول كەزدە اكەم رەنجىپ ايتقان. سودان اكەمە كورسەتپەي، ەسىك الدىندا جاتاتىن سايماندارىن الىپ، دومبىرانى جاساپ شىعاردىم. سوسىن كەشكە مال باعىپ كەلگەننەن كەيىن اكەم ءماز بولىپ قالسىن دەپ ۇكىسىن تاعىپ، تورگە ءىلىپ قويدىم. سول كەزدە اكەمنىڭ بالاشا قۋانعانى ءالى ەسىمنەن كەتپەيدى.

 اقتاۋلىق شەبەر جاساعان دومبىرالار قازاق ەلىنىڭ بارلىق وڭىرلەرىنە تارالعان. ءبىرى الماتىدا، ىقىلاس دۇكەن ۇلى اتىنداعى ۇلت- اسپاپتار مۇراجايىندا ءىلۋلى تۇر. ايتا كەتەيىك، نۇرجاننىڭ قولىنان شىققان قوڭىر ءۇندى ءتول اسپاپقا قارشىعا احمەدياروۆ، سەرجان شاكىرات سەكىلدى قازاقتىڭ كۇي ساڭلاقتارىنىڭ نازارى ءتۇسىپ، باتاسىن العان.

 سەرجان شاكىرات، ق ر ەڭبەك سىڭىرگەن قايراتكەرى، داۋلەسكەر كۇيشى:

- مەندە 4 دومبىرا بار. سونىڭ ۇشەۋىن وسى نۇرجان جاساعان. مۇنىڭ دومبىرالارى قولعا جاتىق. سودان كەيىن ءۇنى، دىبىسى دومبىرانىڭ سابىنا، ءون بويىنا بىركەلكى. وتە جاقسى.

شەبەردىڭ ەندىگى ماقساتى -  ماڭعىستاۋ وڭىرىندە العاش رەت دومبىرا جاساۋ ىسىنە باۋليتىن بالالار مەكتەبىن اشۋ. ازىرگە سوڭىنا ەرگەن 4 ۇلىنا اتا كاسىپتىڭ قىر- سىرىن ۇيرەتىپ كەلەدى.

www.24.kz