سالماعى 500 كەلىگە جەتكەن بويجەتكەن ورنىنان تۇرا الماي قالدى

استانا. قازاقپارات - مىسىردىڭ الەكساندريا قالاسىندا تۇراتىن وتباسى دارىگەرلەر قاۋىمى مەن قالىڭ كوپشىلىكتەن دەنەسىنىڭ وراسان زور ۇلكەندىگىنە بايلانىستى ءومىرىنىڭ كوپ ۋاقىتىن ۇيدە وتكىزىپ كەلە جاتقان تۋىستارىنا جاردەم بەرۋدى سۇرايدى.

بۇل تۋرالى The Daily Mirror اقپارىنا سىلتەمە جاساعان ras.kz حابارلادى.

ولار ەگەر كايردەگى اۋرۋحانالاردىڭ بىرىندە شۇعىل وپەراتسيا جاساماسا، سالماعى 500 كەلى تارتاتىن 36 جاستاعى يمان احماد ءابدۋلاتيدىڭ ءولىپ قالاتىنىن ايتىپ، دابىل قاعۋدا.

باسىلىم حابارلاعانداي، يماننىڭ ۇيدەن شىقپاعانىنا 25 جىل بولىپتى. ول ەشقاشان الدەقانداي وقۋ ورنىنا بارىپ وقىپ كورمەگەن. قىزعا ءسىڭلىسى مەن اناسى كومەكتەسىپ تۇرادى.

يمان بالا جاسىندا ەلەفانتياز دەگەن اۋرۋمەن اۋىرىپتى. بۇل ليمفاتيكالىق جۇيەنى بۇزىپ، دەنەگە وزگەرىس اكەلەدى.

اناسى مەن ءسىڭلىسىنىڭ ايتۋلارىنشا، قىزدىڭ جاسوسپىرىم شاعىندا اۋرۋى كۇشەيىپ كەتۋىنە اكەسى ولگەننەن كەيىن العان قاتتى سترەسسى اسەر ەتىپتى. ول كوپ جىلدار بويى ءوز اۋرۋىنا ءوزى باقىلاۋ جاساپ كەلىپتى. دەگەنمەن، قازىر دارىگەرلەردىڭ كومەگىنە جۇگىنىپ، سىرقاتىن جەڭىلدەتۋدەن ءۇمىتى دە جوق ەمەس.