اراب شەيحتارى ءبىر دۋاداق اتسا قازاقستانعا 500 مىڭ تەڭگە تولەيدى

استانا. قازاقپارات - اۋىل شارۋاشىلىعى مينيسترلىگى دۋاداق اۋلاۋعا رۇقسات بەرەتىن ۇكىمەت قاۋلىسىن ەگجەي- تەگجەيلى ءتۇسىندىردى، دەپ حابارلايدى قازاقپارات ءتىلشىسى.

 مينيسترلىكتىڭ باسپا ءسوز قىزمەتى حابارلاعانداي، بيىل قازاقستاندا 174 دارا دۋاداق اۋلاۋعا رۇقسات ەتىلگەن. جانە دە قۇستاردى اۋلاۋ ءۇشىن بىرىككەن اراب امىرلىكتەرى مەن كاتاردىڭ تەك جەكەلەگەن تۇلعالارىنا عانا رۇقسات بەرىلەدى ەكەن. اڭشىلىق كەزىندە اتىلعان ءبىر دۋاداقتىڭ قۇنى 260 ايلىق ەسەپتىك كورسەتكىشكە تەك، ياعني  551460 تەڭگە.

جالپى، پارسى شىعاناعىنداعى ەلدەر قازاقستاندا دۋاداق اۋلاۋعا رۇقسات الۋ ءۇشىن ەلىمىزبەن مىنانداي كەلىسىم جاساۋعا شاقىرعان. اراب ەلدەرىنىڭ ءبىرىنشى تۇلعالارىمەن ۇزاق ۋاقىت ىنتىماقتاستىق ورناتا وتىرىپ، دۋاداققا قۇس سالىپ اۋلايتىن ءداستۇرلى جالعاستىرۋ ءۇشىن، ولاردىڭ سانىن كوبەيتىپ، قورعاۋعا قارجى بولەيىك دەگەن باستاما كوتەرىپتى.

«وسى كەلىسىم اياسىندا اراب ينۆەستيتسياسىنىڭ ەسەبىنەن وڭتۇستىك قازاقستان وبلىسىندا جاساندى جولمەن دۋاداق سانىن كوبەيتەتىن ورتالىق سالىنىپ، جۇمىس ىستەپ تۇر. سول ورتالىقتا كوبەيگەن دۋاداق كەيىن قازاقستان دالاسىنا جىبەرىلەدى. جىل سايىن وسى ورتالىقتان بەس مىڭعا تارتا دارا دۋاداق ەن دالاعا ۇشىرىلعان. اراب تاراپى قازاقستان الدىنداعى ءوز مىندەتىن ورىنداۋ ءۇشىن 2009-2016 -جىلدار ارالىعىندا قازاقستاننىڭ تابيعاتىنا  7555 دۋاداق قۇس ۇشىرعان. ياعني، اراب تارابى بۇل قۇس ءتۇرىن كوبەيتىپ، قازاقستان اۋماعىنا شىعارادى، ال، قازاقستان ۇكىمەتى ولاردى اۋلاۋعا رۇقسات ەتەدى. ءبىراق، اۋلاۋعا بولاتىن قۇستاردىڭ سانىن وتە از مولشەردە بەلگىلەيدى» ، - دەپ ءتۇسىندىردى ا ش م- نىڭ باسپا ءسوز قىزمەتى.

اۋىل شارۋاشىلىعى مينيسترلىگىنىڭ مالىمەتىنە سۇيەنسەك، قازاقستاندا  9500 گە تارتا داۋاداق بار.