ايگىلى سپورتشىنىڭ ەمى ءۇشىن ايىنا 500 مىڭ ەۋرو جۇمسالادى

استانا. قازاقپارات - نەمىستىڭ ايگىلى اۆتوسپورتشىسى، جەتى دۇركىن الەم چەمپيونى، «فورمۋلا-1» جارىسىنىڭ جەڭىمپازى ميحاەل شۋماحەردىڭ ەمى ءۇشىن قوماقتى قاراجات جۇمسالسا دا، سپورتشىنىڭ دەنساۋلىعى ءالى دە اۋىر.

فرانسيانىڭ Le Parisien باسىلىمى سپورتشىنىڭ ەمى ءۇشىن 500 مىڭ ەۋرو جۇمسالاتىنىن جاريالادى. «ميحاەل سپورتتا ءجۇرىپ 715 ميلليون ەۋرو تابىس تاپتى. قازىردە بۇل اقشا ەمىنە تولىقتاي جەتكىلىكتى. الايدا، قازىردىڭ وزىندە ونىڭ وتباسى ارنايى تۇردە تاپسىرىسپەن جاسالعان، ءتۇرلى جابدىقپەن جابدىقتالعان Ferrari FXX Evoluzione كولىگىن 11,2 ميلليون ەۋروعا ساتىلىمعا شىعاردى. ءبىر جىل كولەمىندەگى شۋماحەردىڭ فيزيكالىق تۇرعىدان جاعدايى وزگەرىسسىز، ءبىر قالىپتى. ءالى دە تۋىستارىمەن سويلەسىپ، ءوز بەتىمەن قوزعالا المايدى. ال سالماعى بار-جوعى 45 كەلى. بۇل ونىڭ ءوز سالماعىنان 25 كەلى جوعالتقان. ەڭ وكىنىشتىسى، سپورتشى ءالى كۇنگە اينالاسىندا نە بولىپ جاتقانىن تۇسىنبەيدى»، - دەپ جازادى باسىلىم.

ميحاەل شۋماحەردىڭ مەنەدجەرى سابينا كەم وسىدان جەتى اي بۇرىن ونىڭ جاعدايى جاقسارىپ كەلە جاتقاندىعىن ايتقان بولاتىن. ءبىراق وسىدان كەيىن تىلشىلەرگە تۇشىمدى جاۋاپ قايتارماي، تەك جەلتوقسان ايىندا عانا بۇل سوزدەرىنىڭ شىندىققا جاناسپايتىنىن مويىندادى.

ايتا كەتەيىك، 46 جاستاعى نەمىس سپورتشىسى 2013-جىلى فرانسيانىڭ مەريبەلە تاۋلى ايماعىندا شاڭعى تەۋىپ ءجۇرىپ، قاتتى قۇلاعان بولاتىن. سالدارىنان باس سۇيەك-مي جاراقاتىن الىپ، ميىنىڭ ەكى جارتىشارىنا زاقىم كەلدى. بۇگىندە ول 2014-جىلدىڭ قىركۇيەگىنەن باستاپ، جەنيەۆا وزەنىنىڭ جاعاسىندا ورنالاسقان ءزاۋلىم ۇيىندە ەم-دوم قابىلداپ جاتىر، دەپ جازادى sport.ru.