ەگيپەتتىڭ تۋريستىك سەكتورى 500 ميلليون دوللار شىعىنعا ۇشرايدى

استانا. قازاقپارات - ەگيپەت كۋرورتتارىنا ءبىرقاتار ەلدەردىڭ بۇل ەلگە ۇشۋلاردى توقتاتۋى سالدارىنان قىس ايلارىندا قوناق ۇيلەردى برونداۋدى الىپ تاستاۋدان كەلەتىن تىكەلەي شىعىندارى 500 ميلليون دوللاردى قۇرايدى، دەپ حابارلادى ر ي ا نوۆوستي ەگيپەتتىڭ تۋريستىك پالاتاسى قاۋىمداستىعى باسقارماسىنىڭ مۇشەسى حۋسام اش-شايرعا سىلتەمە جاساپ.

«ءبىرقاتار ەلدەردىڭ ۇشۋلاردى توقتاتۋىنان جانە قىس ايلارىندا قوناقۇيلەردى برونداۋدى الىپ تاستاۋىنان كەلەتىن تىكەلەي شىعىندار 500 ميلليون دوللارعا جۋىق قارجىنى قۇرايدى. ءبىزدىڭ ەسەپتەۋىمىز بويىنشا، ەگەر بۇل ماسەلە تاياۋداعى ءتورت-بەس كۇننىڭ ىشىندە شەشىلمەسە، ەگيپەت جىل ىشىندە 2 ميلليارد دوللار جوعالتادى»، - دەدى اش-شاير.

ەسكە سالا كەتەيىك، رەسەيلىك جانە كەڭەستىك اۆياتسيا تاريحىنداعى ءىرى اپات 31- قازاندا بولدى. «كوگالىماۆيا» اۆياكومپانياسىنىڭ شارم-ەش-شەيحتان سانكت-پەتەربورعا ۇشىپ شىققان Airbus ا321 ۇشاعى سينايدا اپاتقا ۇشىرادى. ونىڭ بورتىندا 217 جولداۋشى جانە جەتى ەكيپاج مۇشەسى بولدى. ولاردىڭ ءبارى دە قازاعا ۇشىرادى.