الماتىدا سەل تاسقىنىنان كەيىن 500 گە جۋىق ادام قاۋىپسىز ايماققا كوشىرىلدى
بۇل تۋرالى قازاقپارات تىلشىسىنە ق ر ءى ءى م توتەنشە جاعدايلار كوميتەتىنىڭ «قاز سەلدەن قورعاۋ» م م- ءنىڭ الماتى ايماقتىق تەحنيكالىق پايدالانۋ باسقارماسى باسشىسىنىڭ ورىنباسارى سامات داۋلەنقانوۆ ءمالىم ەتتى.
ونىڭ ايتۋىنشا، الماتى تۇرعىندارىنا كەلەر ەشقانداي قاۋىپ جوق. قازىر سەلدىڭ سالدارىن جويۋ جۇمىستارى جۇرگىزىلىپ جاتىر. سۋ قارعالى وزەنى بويىمەن شليۋزدەر ارقىلى تومەن قاراي اعىزدىرىلىپ جاتىر.
«سوڭعى كۇندەرى كۇننىڭ قاتتى ىسىپ كەتۋىنە بايلانىستى مۇزدىقتار ەرىپ، قارعالى وزەنىندەگى بوگەتتىڭ جوعارى جاعىندا، ياعني تاۋ ىشىندە مورەنالىق كولشىكتىڭ سۋى كوتەرىلدى. ونىڭ جيەگى بۇزىلماعانىمەن، ونداعى جينالعان سۋ كولشىكتىڭ تابانى ارقىلى ءوتىپ كەتىپ، بوگەتكە قاراي اققان. ءبىراق بوگەت بۇزىلعان جوق. تاۋدان دومالاعان تاستار وسىندا تىرەلدى. كولشىكتە قازىر سۋ جوق. ەكىنشى تاسقىن بولمايدى. قازىر الماتى ايماقتىق تەحنيكالىق پايدالانۋ باسقارماسى تاراپىنان 15 تەحنيكا مەن جەكە قۇرامنان 40 ادام سەلدىڭ سالدارىن جويۋ جۇمىستارىنا جۇمىلدىرىلعان»، - دەدى س. داۋلەنقانوۆ.
ايتا كەتەلىك، قازىر وقيعا ورنىندا الماتى قالالىق توتەنشە جاعدايلار دەپارتامەنتىنىڭ بولىمشەلەرى دە تابيعي اپات سالدارىن جويۋ جۇمىستارىن جۇرگىزۋدە. سوڭعى مالىمەتتەر بويىنشا قارعالى وزەنى بويىنداعى تۇرعىن ۇيلەردىڭ تۇرعىندارى اۋداندىق اكىمدىك پەن 176№ ورتا مەكتەپكە ورنالاستىرىلىپ جاتىر.
اۆتور: جاپپاربەرگەن ايبوتا
