ءۇندىستاننىڭ وڭتۇستىگىندە اپتاپ ىستىق قۇرباندارىنىڭ سانى 500 گە جەتتى

استانا. قازاقپارات - وڭتۇستىك ءۇندىستاندىق اندحرا- پرادەش جانە  تەلانگانا شتاتتارىندا قاتتى ىستىق سالدارىنان سوڭعى ءتورت كۇندە قازا تاپقانداردىڭ  سانى 500 گە جەتتى، دەپ جازادى  Times of India گازەتى.

بۇدان بۇرىن ولاردىڭ سانى 335 بولعان.

جەكسەنبىدەگى الدىن الا دەرەكتەر بويىنشا، ەل وڭتۇستىگىندەگى اپتاپ ىستىقتان 165 ادام قازا تاپقان. اندحرا- پرادەش شتاتىنداعى ماچيليپاتنام،  تۋني قالالارىندا اۋا تەمپەراتۋراسى 47°C - قا جەتكەن، دەپ حابارلادى   ر ي ا «نوۆوستي».

مەتەورولوگتاردىڭ دەرەكتەرىنە سۇيەنسەك، تەمپەراتۋرا تاياۋ كۇندەرى كوتەرىلە تۇسپەك. بيلىك شتات  تۇرعىندارىن اباي بولۋعا، كوشەگە كوپ شىقپاۋعا شاقىردى.

ءۇندىستاننىڭ كوپ بولىگىندە جىلدىڭ وسى كەزەڭىندە اۋا تەمپەراتۋراسىنىڭ 40 گرادۋستان اسۋى - ادەتتەگى اۋا رايى قۇبىلىسى. ناۋرىز- ماۋسىم ارالىعىندا كەيىن جاۋىنمەن الماساتىن قۇرعاق ماۋسىم ورىن الادى. بۇل ەلدە ءساۋىر مەن مامىر ەڭ ىستىق، قۇرعاق ماۋسىم سانالادى.