الماتىداعى قازاقستان- قىتاي ىسكەرلىك ىنتىماقتاستىعى فورۋمىنا 500 دەن استام كاسىپكەر قاتىسۋدا
«بۇل فورۋم، وسىمەن 13- رەت وتكىزىلىپ وتىرعان قازاقستانداعى قىتاي تاۋارلارى كورمەسى اياسىندا العاش رەت ۇيىمداستىرىلىپ وتىر. فورۋم بارىسىندا ءار ءتۇرلى تاۋارلار مەن قىزمەت تۇرلەرىن ۇسىناتىن جانە قازاقستاندىق كومپانيالارمەن ىنتىماقتاستىق قۇرۋعا مۇددەلى 70 قىتايلىق كومپانيا وكىلدەرى قازاقستاندىق ارىپتەستەرىمەن كەزدەسىپ، ءوزارا ىنتىماقتاسۋ جونىندە كەلىسسوزدەر جۇرگىزەدى.
ال قازاقستان تاراپىنان 100 استام كومپانيا باسشىلىعى قاتىسۋدا. قىتايلىق ءبىر كومپانيا كەم دەگەندە 4 قازاقستاندىق كاسىپكەرمەن كەلىسسوز جۇرگىزەدى دەپ كۇتىلۋدە. جالپى فورۋم بارىسىندا 200 جۋىق كەلىسىمشارتتار جاسالادى دەگەن ۇمىتتەمىز»، - دەدى ءوز سوزىندە الماتى قالاسىنىڭ ساۋدا جانە ينۆەستيتسيا پالاتاسىنىڭ باس ديرەكتورى مۇحتارحان بياروۆ.
سونىمەن قاتار، مۇحتارحان نۇرالدى ۇلى بۇگىن «اتاكەنت» ىسكەرلىك ىنتىماقتاستىق ورتالىعىدا ءوتىپ جاتقان 13- قازاقستانداعى قىتاي تاۋارلارى كورمەسىنە 200 دەن استام قىتايلىق كومپانيا قاتىسىپ جاتقاندىعىن جەتكىزدى.
«بيىل كورمەنىڭ گەوگرافياسى كەڭەيىپ وتىر. ەگەر بۇرىندارى كوبىنەسە شىنجاڭ ۇيعىر اۆتونوميالىق وكرۋگىنىڭ كاسىپكەرلەرى كەلەتىن بولسا، بيىل ىشكى قىتايدان - گۋاڭجوۋ، شاڭحاي، شانشي ولكەلەرىنىڭ كاسىپورىندارى قاتىسىپ وتىر. كورمەگە نەگىزىنەن اۋىل شارۋاشىلىعى، قۇرىلىس، مەديتسينا، كوسمەتيكا جانە جاڭا تەحنولوگيالار سالالارىنىڭ ونىمدەرى قويىلعان. تاعى ءبىر ايتا كەتەتىن جايت، بيىل تۇڭعىش رەت كورمەگە جيھاز جاساۋمەن اينالىساتىن قىتايلىق كومپانيالار قاتىسىپ، ءوز ونىمدەرىن ۇسىنىپ جاتىر»، - دەدى م. بياروۆ.
فورۋم بارىسىندا قىتاي تاراپىنان ءسوز العان قىتاي حالىق رەسپۋبليكاسىنىڭ الماتىعى باس كونسۋلى جاڭ ۋىي مىرزا قازاقستاندىق جانە قىتايلىق كومپانيالاردىڭ ىسكەرلىك كەزدەسۋىنىڭ جوعارى دارەجەدە ءوتىپ جاتقاندىعىن جانە قازاقستاندىق كاسىپكەرلەر ءۋشىن بۇل فورۋم الماتىدا تۇرىپ- اق، قىتايدان جابدىقتاۋشىلار مەن ساتىپ الۋشىلاردى تابۋعا مۇمكىندىك بەرەتىندىگىن ايتىپ، قاتىسۋشىلارعا ساتتىلىك تىلەدى.
ايتا كەتەلىك، فورۋم جۇمىسى بۇگىن اياقتالادى. ال كورمە 23 - مامىرعا دەيىن جالعاسادى.
اۆتور: جاپپاربەرگەن ايبوتا
