ەلىمىزدە تابىسى كۇنكورىس دەڭگەيىنەن تومەن ادامدار سانى 500 مىڭعا جۋىقتادى

استانا. قازاقپارات - ەلىمىزدە تابىسى كۇنكورىستىڭ ەڭ تومەنگى دەڭگەيىنەن تومەن حالىقتىڭ ۇلەسى 2014-جىلدىڭ 2- توقسانىندا 2,9 پايىزدى نەمەسە 497,7 مىڭ ادامدى قۇرادى.

اتالعان كورسەتكىش وتكەن جىلعى ءتيىستى كەزەڭنەن 0,3 پايىزعا تومەن. بۇل تۋرالى ق ر ۇلتتىق ەكونوميكا مينيسترلىگى ستاتيستيكا كوميتەتىنىڭ باسپا ءسوز قىزمەتىنەن حابارلاندى.

كوميتەت مالىمەتىنە قاراعاندا، تابىسى كۇنكورىستىڭ ەڭ تومەنگى دەڭگەيىنىڭ شاماسىنان تومەن اۋىلدىق جەردەگى حالىقتىڭ ۇلەسى قالالىق جەردەگى حالىقتىڭ ۇلەسىنەن 4 ەسەگە ارتىپ، 4,9 پايىزدى نەمەسە 384,1 مىڭ ادامدى قۇراپ وتىر. سونىمەن قاتار، 2014-جىلدىڭ 2- توقسانىندا تابىسى كۇنكورىس دەڭگەيىنەن تومەن حالىقتىڭ باسىم ۇلەسى وڭتۇستىك قازاقستان (5,5 پايىز)، جامبىل (3,6 پايىز) وبلىستارىنا تيەسىلى بولسا، ەڭ از ۇلەسى استانا (0,3 پايىز) جانە الماتى (0,7 پايىز) قالالارىندا بايقالادى.

«ءۇي شارۋاشىلىقتارىنىڭ اقشالاي شىعىستارى ولاردىڭ ماتەريالدىق قامتاماسىز ەتىلۋىنە تىكەلەي بايلانىستى. حالىقتىڭ شىعىستارى مەن تۇتىنۋى دەتسيلدىك ءبولۋ كەزىندە تابىستار سياقتى ايتارلىقتاي سارالانۋدى كورسەتەدى. مىسالى، 2014-جىلدىڭ 1- توقسانىندا 10 پايىز ەڭ از جانە 10 پايىز ەڭ كوپ قامتاماسىز ەتىلگەن حالىقتىڭ ازىق-تۇلىك تاۋارلارىنا جۇمساعان شىعىستارى اراسىنداعى ايىرماشىلىق 4,2 ەسەنى، ازىق-تۇلىك ەمەس تاۋارلارعا - 6,1 ەسەنى، ال اقىلى قىزمەتتەرگە - 8,2 ەسەنى قۇرادى»، - دەلىنگەن باسپا ءسوز بايانىندا.

اۆتور: قانات مامەتقازى ۇلى