شىمكەنت اكىمدىگى قالا كۇنىندە م س سايلاۋبەكتى 5000 دوللارعا شاقىردى دەگەن اقپاراتقا تۇسىنىكتەمە بەردى
بۇل تۋرالى NUR. KZ تىلشىسىنە سۇحبات بەرگەن قالا اكىمىنىڭ كەڭەسشىسى ءارى باسپا ءسوز قىزمەتىنىڭ جەتەكشىسى نۇرلىبەك جەڭىسبەك مالىمدەدى.
ەستەرىڭىزگە سالا كەتسەك، وتكەن اپتادا «شىمكەنتتەگى قالا كۇنىنە تۇسىنىكسىز تىلدە رەپ وقيتىن م س سايلاۋبەك 5000 دوللارعا ءان سالدى» دەگەن سىبىس شىققان بولاتىن. ءتىپتى، ساحنا سىرتىنداعى سۋرەتتەرى مەن شىمكەنتتىك تابىنۋشىلارىمەن تۇسكەن فوتولارى الەۋمەتتىك جەلىلەرىندە قاپتاپ، تۇرعىنداردىڭ باسىم كوپشىلىگى قالا باسشىلارىنا نارازىلىق بىلدىرگەن-دى.
شىمكەنتتىكتەردىڭ سوزىنشە: «اكىمدىك 5000 ا ق ش دوللارىن جەلگە شاشتى. سەبەبى، م س سايلاۋبەكتىڭ ونەرى ونداي قارجىعا تىم قىمبات ءارى ەرسى».
الايدا اكىمدىك سايلاۋبەكتىڭ قالا كۇنىندە ونەر كورسەتكەنىن جوققا شىعاردى.
«قالا كۇنىندە ونەر كورسەتكەن بارلىق ونەر ادامىنا اكىمدىك اقشا بەرگەن جوق. ولاردى جەرگىلىكتى كاسىپكەرلەر قالاعا سىيلىق رەتىندە، وزدەرى شاقىردى. ال م س سايلاۋبەكتىڭ قالا كۇنىندە ساحنادا ءان سالدى دەگەنى ءتىپتى وتىرىك. ول شاقىرىلعان قوناقتار تىزىمىندە جوق. ەستۋىمشە، قالاداعى جەكە بار كليەنتتەرىنىڭ كوڭىلىن كوتەرۋ ءۇشىن سايلاۋبەكتى شاقىرتىپ، ءان سالدىرعان. ونىڭ بىزگە قاتىسى جوق»، - دەدى ول.
