ماڭعىستاۋ وبلىسىندا 500 مىڭ تەڭگە پارا العان اۋىل اكىمى 8 جىلعا سوتتالدى

استانا. قازاقپارات - ماڭعىستاۋ وبلىسىنىڭ ءومىرزاق اۋىلىنىڭ اكىمى جارتى ميلليون تەڭگە پارا العاندىعى ءۇشىن 8 جىلعا سوتتالدى. بۇل تۋرالى اقتاۋ قالالىق سوتىنىڭ باسپا ءسوز قىزمەتىنەن حابارلاندى.

 اتاپ ايتقاندا، اقتاۋ قالالىق سوتى قىلمىستىق ءىستى قاراۋ بارىسىندا ءومىرزاق اۋىلىنىڭ اكىمى ابدوللا مۇعالوۆپەن كەنت اكىمشىلىگىنىڭ باس مامانى رۇستەم وتەشيەۆكە قاتىستى ۇكىمىن جاريالاعان. وعان سايكەس، ابدوللا مۇعالوۆ مۇلكى تاركىلەنىپ، جازاسىن جالپى تارتىپتەگى كولونيادا وتەۋگە 8 جىلعا سوتتالدى. ال رۇستەم وتەشيەۆ 7 جىلعا باس بوستاندىعىنان ايىرىلعان.

تەرگەۋ انىقتاعانىنداي، اكىم ابدوللا مۇعالوۆ پەن مامان رۇستەم وتەشيەۆ جەر تەلىمىن بەرۋگە رۇقسات بەرۋ ءۇشىن ي. دەگەن ازاماتتان 500 مىڭ تەڭگە پارا الىپ، ونى مەملەكەتتىك قىزمەتكەرلەر ءوزارا بولىسكەن. بۇل دەرەكتەر سوتتا دالەلدەندى.

اۆتور: قانات مامەتقازى ۇلى