الەمدە 500 مىڭنان استام ادامنىڭ قاتەرلى ىسىك اۋرۋىنان كوز جۇمۋىنا 2008 -جىلعى قارجى داعدارىسى سەبەپ بولعان

استانا. قازاقپارات - 2008 -جىلعى داعدارىستىڭ سالدارلارىنىڭ ءبىرى جۇمىسسىزدىق پەن الەۋمەتتىك شىعىنداردىڭ تومەندەۋىنە بايلانىستى قاتەرلى ىسىك اۋرۋىنا شالدىققان 500 مىڭنان استام ادامنىڭ قازا تابۋى بولدى، دەلىنگەن ا ق ش پەن بريتانيانىڭ جەتەكشى ۋنيۆەرسيتەتتەرى عالىمدارىنىڭ ماقالاسىندا، دەپ حابارلادى ر ب ك.

The Lancet مەديتسينالىق جۋرنالىندا جاريالانعان ماقالانىڭ اۆتورلارى 2008-2010 -جىلدار ارالىعىندا ەكونوميكالىق ىنتىماقتاستىق جانە دامۋ ۇيىمىنا مۇشە ەلدەردە عانا 260 مىڭ قاتەرلى ىسىك اۋرۋىنا شالدىققان ناۋقاس ەكونوميكالىق داعدارىس سالدارىنان اجال قۇشتى دەگەن توقتامعا كەلدى. ولار جۇمىسىنان ايىرىلعاندىقتان، سونىمەن قاتار ءبىرقاتار مەملەكەتتەر الەۋمەتتىك شىعىنداردى ازايتۋ شەشىمىن قابىلداعاندىقتان ءتيىستى مەديتسينالىق كومەك الا الماعان.

بايانداما اۆتورلارىنىڭ ەسەپتەۋىنشە، الەم بويىنشا قاتەرلى ىسىك اۋرۋلارىنا شالدىعىپ، وسىنداي قيىندىقتار سالدارىنان اجال قۇشقان ادامداردىڭ سانى 500 مىڭنان اسۋى مۇمكىن.

زەرتتەۋشىلەر جۇمىسسىزدىق دەڭگەيىنىڭ %1 ۇلعايۋى وبىر دەرتىمەن اۋىراتىن ءار ءجۇز ناۋقاستىڭ 0,37 سى قايتىس بولۋىنا سوقتىراتىنىن انىقتادى. دەنساۋلىق ساقتاۋ سالاسىنا بولىنەتىن شىعىستاردىڭ %1 ازايۋى ونكولوگيالىق اۋرۋلارعا شالدىققان ءار ءجۇز ادامنىڭ 0,0053 ى قايتىس بولۋىنا سەبەپ بولادى.

زەرتتەۋ اياسىندا دۇنيەجۇزىلىك دەنساۋلىق ساقتاۋ ۇيىمى مەن دۇنيەجۇزىلىك بانكتىڭ تۇرعىندارىنىڭ جالپى سانى 2 ميلليارد ادامدى قۇرايتىن 75 ەل بويىنشا 1990-2010 -جىلدار ارالىعىنداعى مالىمەتتەرى ساراپتالدى.