ءار جەڭىمپازعا 500 مىڭ تەڭگە: ر. رايىمقۇلوۆتىڭ 110 جىلدىعىنا ارنالعان بايقاۋ جاريالاندى

استانا. قازاقپارات - ءال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتى قازاق ادەبيەتىنىڭ كورنەكتى وكىلى، بەلگىلى جازۋشى راحمەتوللا رايىمقۇلوۆتىڭ تۋعانىنا 110 جىل تولۋىنا وراي ستۋدەنتتەر، ماگيسترانتتار، PhD- دوكتورانتتار مەن جاس عالىمدار اراسىندا «راحمەتوللا رايىمقۇلوۆ - ⅩⅩ عاسىردىڭ كورنەكتى قالامگەرى» اتتى رەسپۋبليكالىق بايقاۋ جاريالادى.

بايقاۋعا قاتىسۋعا نيەت بىلدىرگەن جاس قالامگەرلەر ءوز ماتەريالدارىن 2023-جىلدىڭ 28- ساۋىرىنە دەيىن ۇسىنا الادى. بايقاۋ ناتيجەلەرى 2023-جىلدىڭ 11- مامىرىندا شىعارىلادى.

قازىلار القاسى قۇرامىنا ءال-فارابي اتىنداعى قاز ۇ ۋ- دىڭ وقىتۋشى پروفەسسورلارى، جۋرناليستيكا جانە ادەبيەت تەورياسىن زەرتتەۋشى عالىمدار، قوعام قايراتكەرلەرى، بەلگىلى قالامگەرلەر مەن جۋرناليستەر كىرەدى. ەڭ ۇزدىك جۇمىستار قازىلار القاسى مۇشەلەرىنىڭ وتىرىسىندا ىرىكتەلەدى.

بايقاۋدىڭ باستى ماقساتى - جاستاردىڭ ادەبيەتكە دەگەن قىزىعۋشىلىعىن ارتتىرىپ، ۇلتتىق ادەبيەتتىڭ بەدەلىن نىعايتۋعا ۇلەس قوسۋ، بالالار ادەبيەتىن دامىتۋعا كۇش سالۋ، سونداي-اق جازۋشى ر. رايىمقۇلوۆتى ءوز زامانىنىڭ كورنەكتى قالامگەرى، تاريحي تۇلعاسى رەتىندە تانىتۋ، دارىپتەۋ.

بايقاۋ كەلەسى نوميناتسيالار بويىنشا جۇرگىزىلەدى:

• ۇزدىك اڭگىمە (ەركىن تاقىرىپ)؛

• بالالارعا ارنالعان ۇزدىك شىعارما (ەرتەگى، مىسال، اڭگىمە، ت. ب.)، (ەركىن تاقىرىپ)؛

• ۇزدىك تانىمدىق ماقالا (جازۋشى ر. رايىمقۇلوۆتىڭ ءومىرى مەن شىعارماشىلىعى تۋرالى تانىمدىق ماقالا).

بايقاۋدىڭ شارتتارى:

• بايقاۋدا 2023-جىلدىڭ 1- اقپانى مەن 28- ءساۋىرى ارالىعىندا جولدانعان تۋىندىلار ىرىكتەلەدى؛

• بايقاۋعا قازاقستاننىڭ بارلىق ايماعىنداعى جوعارى وقۋ ورىندارى مەن ءبىلىم جانە عىلىم مەكەمەلەرىنىڭ 35 جاستان اسپاعان ستۋدەنتتەرى مەن ماگيسترانتتارى جانە PhD- دوكتورانتتار مەن جاس عالىمدار قاتىسا الادى؛

• بايقاۋعا تەك قازاق تىلىندەگى شىعارمالار قابىلدانادى؛

• ءبىر اۆتور ءبىر جانر بويىنشا عانا بايقاۋعا قاتىسادى؛

• بايقاۋعا ۇسىنىلاتىن شىعارمالار مەرزىمدى باسىلىمداردا جاريالانباعان، كىتاپقا ەنگىزىلمەگەن جانە بۇعان دەيىن باسقا بايقاۋلاردا جۇلدەلى ورىن الماۋى ءتيىس.

بايقاۋ جۇمىستارىنا قويىلاتىن تالاپتار:

• كوركەمدىك ساپانىڭ جوعارى بولۋى؛

• تاقىرىپتىڭ اشىلۋى؛

• ءتىل تازالىعى؛

• لوگيكالىق ۇيلەسىم؛

• وي تەرەڭدىگى؛

• مۇراعاتتىق اقپاراتتاردىڭ شىنايىلىعى؛

• جاڭاشىلدىعى.

بايقاۋدىڭ ءار نوميناتسيا بويىنشا جەڭىمپازى 500000 تەڭگە كولەمىندە اقشالاي سىيلىقپەن ماراپاتتالادى. قوسىمشا 3 قاتىسۋشىعا ىنتالاندىرۋ سىيلىعى رەتىندە 100000 تەڭگەدەن بەرىلەدى.

جۇمىستى راسىمدەۋ تالاپتارى:

• بايقاۋ جۇمىستارى ا-4 فورماتىندا، Times New Roman قارپىمەن، 14 مولشەردە، 1,15 ارالىقتا تەرىلۋى كەرەك؛

• بايقاۋعا ۇسىنىلاتىن ماتەريالدار كولەمى 7-8 بەتتەن اسپاۋى ءتيىس؛

• ءبىرىنشى فايلدا شىعارمانىڭ ءبىرىنشى بەتىنىڭ جوعارعى جاعىنا شىعارمانىڭ نوميناتسياسى جانە اۆتوردىڭ بۇركەنشىك ەسىمى عانا جازىلادى. ەكىنشى فايلدا اۆتوردىڭ بۇركەنشىك ەسىمى جانە اۆتوردىڭ تولىق اتى-ءجونى كورسەتىلۋى ءتيىس. سونداي-اق، مەكەنجايى، بايلانىس تەلەفونى جازىلۋى كەرەك؛

• بايقاۋ ماتەريالدارى اۆتورلارعا قايتارىلمايدى.

• ماتەريالدار ەلەكتروندى نۇسقادا قابىلدانادى.

بايقاۋ ماتەريالدارى مىنا ەلەكتروندى پوشتاعا جىبەرىلۋى ءتيىس: [e-mail].