50 قۇسبەگى، 74 قىران قۇس: زەرەندىدە حالىقارالىق «قانسونار-2026» تۋرنيرى ءوتىپ جاتىر
استانا. KAZINFORM – اقمولا وبلىسىنىڭ زەرەندى اۋدانىنداعى ايدارلى اۋىلىندا ءماسىپ باتىرحان ۇلى اتىنداعى حالىقارالىق «قانسونار-2026» قۇسبەگىلىك تۋرنيرى ءوتىپ جاتىر.
قازاقتىڭ ساياتشىلىق ونەرىن دارىپتەيتىن ءداستۇرلى دوداعا قازاقستاننىڭ ءار وڭىرىنەن جانە تۇركيا، موڭعوليا، رەسەيدەن كەلگەن قۇسبەگىلەر جينالدى. ولاردىڭ اراسىندا الەم جانە ازيا چەمپيوندارى، دۇنيەجۇزىلىك كوشپەندىلەر ويىندارىنىڭ جەڭىمپازدارى مەن جۇلدەگەرلەرى بار.
بيىل حالىقارالىق تۋرنيرگە 50 قۇسبەگى تىركەلگەن. جارىسقا 49 بۇركىت، 15 يتەلگى جانە 10 قارشىعا اكەلىندى. قاتىسۋشىلار بىرنەشە كۇن بويى قىراندارىنىڭ بابىن بايقاپ، ساياتشىلىق ونەرىندەگى شەبەرلىكتەرىن سىنعا سالۋدا.
21-قازاندا بۇركىتتەر اراسىنداعى «قولعا شاقىرۋ» جانە «تۇلكىگە سالۋ» كەزەڭدەرى ءوتتى. ال 22-قازاندا يتەلگى مەن قارشىعا جارىستارى ۇيىمداستىرىلىپ، تۋرنير جەڭىمپازدارى انىقتالادى.
حالىقارالىق دارەجەدەگى تورەشى مارات قويشيننىڭ ايتۋىنشا، بيىلعى جارىسقا تاجىريبەلى قۇسبەگىلەر كوپ كەلگەن. ولاردىڭ قاتارىندا الەمدىك جانە قۇرلىقتىق جارىستاردا توپ جارعان سپورتشىلار دا بار. بۇل قاتىسۋشىلار اراسىنداعى باسەكەنى كۇشەيتە تۇسكەن.
تۋرنيرگە الماتى قالاسىنان كەلگەن ارمان قۇشقاروۆ مەدەۋ اتتى بۇركىتىمەن قاتىسىپ جاتىر. بۇل قىران بۇعان دەيىن دۇنيەجۇزىلىك كوشپەندىلەر ويىندارىندا قازاقستان نامىسىن قورعاپ، كۇمىس جۇلدەگە يە بولعان.
ارمان قۇسبەگىلىك ونەرگە بالا كەزىنەن قىزىققان. اكەسىنىڭ قىران باپتاعانىن كورىپ وسكەن ول ۋاقىت وتە كەلە ساياتشىلىقتىڭ قىر-سىرىن مەڭگەرگەن. ونىڭ ايتۋىنشا، بۇركىتتى جارىسقا دايىنداۋ ءۇشىن تەك تاجىريبە جەتكىلىكسىز. قۇسبەگى ەڭ الدىمەن قولىنداعى قىرانىنىڭ مىنەزىن ءتۇسىنۋى كەرەك.
قۇسبەگى ءۇشىن ەڭ ماڭىزدىسى - قىراننىڭ مىنەزىن ءتۇسىنۋ. ءار بۇركىتتىڭ وزىندىك ەرەكشەلىگى بار، سوندىقتان ولاردىڭ بارىنە بىردەي ءتاسىل قولدانۋعا بولمايدى. قۇستىڭ مىنەزىنە قاراي باپتاۋ ادىستەرىن دە وزگەرتۋ قاجەت، - دەيدى ارمان قۇشقاروۆ.
قۇسبەگىنىڭ سوزىنشە، ءار قىراننىڭ بابىن تابۋ ءۇشىن وعان جەكە كوڭىل ءبولىپ، مىنەز-قۇلقىنا قاراي جۇمىس ىستەۋ قاجەت.
جەتى اتاسى بۇركىتشى بولعان
جارىسقا موڭعوليانىڭ بايان-ولگەي ايماعىنان نۇرعايىپ ىدىرىس ۇلى دا ارنايى كەلگەن. ول 46 جىلدان بەرى قۇسبەگىلىكپەن اينالىسادى. ساياتشىلىق ونەرى ونىڭ وتباسىندا جەتى اتادان بەرى جالعاسىپ كەلەدى.
نۇرعايىپ ىدىرىس ۇلى - بۇركىتشىلىك ونەرىمەن الەمگە تانىلعان قىز ايشولپاننىڭ اكەسى. ول دا اكەسىنەن كورگەن ونەردى بالالارىنا ۇيرەتىپ، اتا-بابا ءداستۇرىن جالعاستىرىپ كەلەدى.
تاجىريبەلى قۇسبەگى «قانسونار» تۋرنيرىنە وسىمەن ءتورتىنشى رەت قاتىسىپ وتىر. بۇل جولى ول موڭعوليادان ۇيادان العان ەكى جاسار بۇركىتىن الا كەلگەن.
نۇرعايىپ ىدىرىس ۇلى قازاقستان حالقىنا سالەم جولداپ، جارىسقا قاتىسىپ جاتقان بارشا قۇسبەگىگە ساتتىلىك تىلەدى.
تۇركيالىق قۇسبەگى قازاقستانعا التىنشى رەت كەلدى
تۋرنيرگە تۇركيادان كەلگەن مۋتلۋ دا قاتىسىپ جاتىر. ول قازاقستانعا وسىمەن التىنشى رەت ساپارلاپ كەلگەن. بۇل جولى جارىسقا يتەلگىسىن الىپ كەلگەن قۇسبەگى ءۇشىن حالىقارالىق دودا تەك جەڭىسكە جەتۋدىڭ مۇمكىندىگى ەمەس، بۇرىننان ارالاساتىن دوستارىمەن قاۋىشاتىن ەرەكشە كەزدەسۋ.
مەن قازاقستاندى دا، قازاق حالقىن دا جاقسى كورەمىن. قۇسبەگىلىك - اتا-بابادان قالعان ەرەكشە ونەر. بۇل جارىستى مەن جاي عانا باسەكە دەپ قابىلدامايمىن. مەن ءۇشىن بۇل - دوستارىممەن، باۋىرلارىممەن قاۋىشاتىن ۇلكەن كەزدەسۋ. ەڭ باستىسى - دوستىق پەن باۋىرلاستىق، - دەيدى مۋتلۋ.
ونىڭ ايتۋىنشا، قۇسبەگىلىك - تۇركى حالىقتارىنا ورتاق كونە ونەر. ساياتشىلىق ءداستۇرى قازاقستان مەن قىرعىزستاندا عانا ەمەس، تۇركياداعى تۇركى قاۋىمداستىقتارى اراسىندا دا ساقتالعان.
دەگەنمەن تۇركيادا قۇسبەگىلىك جارىستارىن ۇيىمداستىرۋدىڭ وزىندىك قيىندىقتارى بار. سوعان قاراماستان، مۋتلۋ الداعى ۋاقىتتا ءوز ەلىندە دە وسىنداي حالىقارالىق تۋرنير وتكىزۋدى جوسپارلاپ ءجۇر. ول قازاقستاندىق قۇسبەگىلەردى تۇركياعا شاقىرىپ، تاجىريبە الماسۋعا نيەتتى.
اقمولا وبلىسىنان العاش رەت قىز بالا قاتىسىپ جاتىر
بيىلعى «قانسونار» تۋرنيرىنىڭ تاعى ءبىر ەرەكشەلىگى - اقمولا وبلىسىنىڭ اتىنان العاش رەت قىز بالانىڭ قاتىسۋى. ول قۇسبەگىلىك ونەردى ەكى جىلدان بەرى مەڭگەرىپ كەلەدى.
ءوڭىر نامىسىن ەرلان كەنجەتايەۆ پەن يگور كوچيەۆنيكوۆ باستاعان قۇسبەگىلەر دە قورعاۋدا. سونداي-اق جارىسقا ۇلتتىق سپورتقا قىزىعۋشىلىق تانىتقان ءتورت جاس سپورتشى قاتىسىپ جاتىر. ولاردىڭ ەڭ كىشىسى - 14 جاستاعى اقمولا وبلىسىنىڭ وكىلى.
اقمولا وبلىسىنىڭ سپورت باسقارماسىنىڭ باسشىسى ارداق تولەنديننىڭ ايتۋىنشا، وڭىردە ۇلتتىق سپورت تۇرلەرىن دامىتۋعا ەرەكشە كوڭىل بولىنگەن. قازىر وبلىستاعى ون سپورت مەكتەبىندە ۇلتتىق سپورت باعىتتارى بويىنشا جۇيەلى جۇمىس جۇرگىزىلىپ كەلەدى.
اسىرەسە زەرەندى جانە بۋراباي اۋداندارىنىڭ سپورتشىلارى رەسپۋبليكالىق جارىستاردا جاقسى ناتيجە كورسەتىپ ءجۇر. ولاردىڭ اراسىندا قازاقستان ۇلتتىق قۇراماسىنىڭ ساپىندا حالىقارالىق دودالارعا قاتىسىپ، جۇلدەلى ورىندارعا يە بولعان قۇسبەگىلەر دە بار.
ارداق تولەندين تۋرنيردىڭ ۇيىمداستىرىلۋ دەڭگەيىنە دە توقتالدى. ونىڭ ايتۋىنشا، جارىس تارتىستى ءوتىپ جاتىر، ال تورەشىلەردىڭ جۇمىسىنا قاتىستى قاتىسۋشىلار تاراپىنان نارازىلىق تۇسپەگەن.
«قانسونار-2026» تۋرنيرىندە قىرانداردىڭ ونەرىن تاماشالاۋمەن قاتار، قازاق حالقىنىڭ سالت-داستۇرىمەن جاقىنىراق تانىسۋعا مۇمكىندىك بار.
جارىس وتەتىن اۋماقتا ارنايى ەتنواۋىل قۇرىلعان. مۇندا كەلگەن قوناقتارعا ۇلتتىق مادەنيەت تانىستىرىلىپ، اسىق اتۋ مەن ساداق اتۋدان كورسەتىلىمدەر ۇيىمداستىرىلعان.
اسىرەسە شەتەلدىك قاتىسۋشىلار ءۇشىن ەتنواۋىل قازاق حالقىنىڭ تۇرمىس-تىرشىلىگى مەن ءداستۇرلى سپورت تۇرلەرىن تانىپ-بىلۋگە مۇمكىندىك بەرىپ وتىر.
ۇيىمداستىرۋشىلاردىڭ ايتۋىنشا، تۋرنيردىڭ باستى ماقساتى - قۇسبەگىلەر اراسىنان ۇزدىكتەردى انىقتاۋ عانا ەمەس، اتا-بابادان جەتكەن ساياتشىلىق ونەردى ساقتاپ، جاس ۇرپاققا ۇيرەتۋ جانە حالىقارالىق دەڭگەيدە كەڭىنەن تانىتۋ.
حالىقارالىق «قانسونار-2026» تۋرنيرى 22-قازاندا اياقتالادى. بۇركىت، يتەلگى جانە قارشىعا باعىتتارى بويىنشا ۇزدىك شىققان قۇسبەگىلەرگە اقشالاي سەرتيفيكاتتار مەن ارنايى سىيلىقتار تابىستالادى.
