ب ۇ ۇ وكىلى: قازاقستانداعى ەڭ ءىرى 50 زاۋىت زياندى قالدىقتاردىڭ 80 پايىزىن شىعارىپ وتىر

نۇر- سۇلتان. قازاقپارات - ب ۇ ۇ دامۋ باعدارلاماسىنىڭ قازاقستانداعى تۇراقتى وكىلى ياكۋپ بەريش ەلدەگى كليمات وزگەرىسىن تەجەۋ مۇمكىندىكتەرى تۋرالى پىكىر ءبىلدىردى، دەپ حابارلايدى قازاقپارات ءتىلشىسى.

«كليماتتىڭ وزگەرۋى دەيتىن ماسەلە قازاقستانعا عانا ءتان ەمەس ەكەنىن ايتقىم كەلەدى. بۇل ماسەلە تەحنولوگيامەن، ۋربانيزاتسيامەن بايلانىستى بولعاندىقتان گلازگودا وتەتىن كەزدەسۋدىڭ كۇن تارتىبىنە ەنگىزىلىپ وتىر. عالامدىق جىلىنۋ جىل سايىن 1,5 گرادۋس دەڭگەيىندە العا جىلجىپ كەلە جاتقانىن تالايدان بەرى ايتىپ ءجۇرمىز. بۇل - بۇكىل الەم ەلدەرىنەن اسا مۇقيات شارالار قابىلداۋدى تالاپ ەتەتىن ماسەلە»، - دەيدى ب ۇ ۇ وكىلى.

ونىڭ سوزىنە قاراعاندا، قازاقستانداعى ەكولوگيالىق ماسەلەلەر الەمنىڭ كوپتەگەن ەلىنە ءتان.

«جەتپەي جاتقان ولقىلىقتار تۋرالى ايتساق، بۇل ىستە قازاقستان عانا ەمەس، ب ۇ ۇ- عا مۇشە كوپتەگەن ەلدەر باياۋ ارەكەت ەتىپ وتىر. اسىرەسە مەملەكەت ساياساتىن ەكولوگيالىق ساياساتقا بەيىمدەپ، ەكولوگيا، اۋىل شارۋاشىلىعى، بيولۋاندىقتى قورعاۋ باعىتىنداعى جۇمىستارعا مەملەكەتتىك ورگانداردىڭ ءبارىن جۇمىلدىرۋ كەرەك»، - دەگەن ياكۋپ بەريش قورشاعان وراتنىڭ تازالىعىنا مەملەكەتتىك ورگاندار مەن جەكە سەكتور قاتار جاۋاپتى ەكەنىن ەسكە سالدى.

«ەنەرگەتيكا مينيسترلىگى مەن اۋىل شارۋاشىلىعى مينيسترلىگى شىعاراتىن شەشىمدەرمەن شەكتەلمەۋىمىز كەرەك. بۇل باستامالاردىڭ ءبارى جەكە سەكتورعا دا اسەر ەتۋى كەرەك. مەن ءوز سوزىمدە ايتقانىمداي، قازاقستانداعى 50 ءىرى كاسىپورىن قورشاعان ورتانى لاستايتىن قالدىقتىڭ 80 پايىزىن شىعارىپ وتىر. بۇل ماسەلەدە بىزگە تاراپتاردىڭ ءبارىن ۇيلەستىرۋ قاجەت. وسىنىڭ ءبارىن قولدايتىن مەحانيزم كەرەك. ب ۇ ۇ دا، ب ۇ ۇ- نىڭ دامۋ باعدارلاماسى دا بۇل ىسكە ۇيلەستىرۋشى رەتىندە قاتىسۋعا دايىن. ارينە، ءبىراق جەرگىلىكتى بيلىكتىڭ قولداۋى ەڭ نەگىزگى ماڭىزعا يە»، - دەدى ب ۇ ۇ وكىلى.

اۆتور: ەسىمجان ناقتىباي