قازاقستاندا 50-60 جاستاعى 325 مىڭ ايەلدىڭ تابىسى جوق - ەڭبەك مينيسترلىگى
مينيستر زەينەتكەرلىك جاسقا دەيىنگى ايەلدەردى جۇمىسپەن قامتۋ ماسەلەلەرىنە ەرەكشە كوڭىل بولىنەتىنىن اتاپ ءوتتى. قازاقستاندا 50 دەن 60 جاسقا دەيىنگى 1 ميلليونعا جۋىق ايەل بار، ونىڭ ىشىندە 325 مىڭىنىڭ تابىسى جوق، بۇل بولاشاقتا زەينەتاقى تولەمدەرىنىڭ تومەن دەڭگەيىنە تىكەلەي اسەر ەتەدى.
«بولاشاق تاۋەكەلدەر ءسوزسىز الەۋمەتتىك سيپاتقا يە بولادى، وسىعان بايلانىستى 2022-جىلدان باستاپ زەينەتكەرلىك جاسقا دەيىنگى ادامدار ءۇشىن «كۇمىس جاس» جوباسى العاش رەت ىسكە قوسىلدى. وتكەن جىلى جوبا اياسىندا 3 مىڭنان استام ادام جۇمىسقا ورنالاستىرىلدى، ولاردىڭ جارتىسى - ايەل. جوباعا قاتىسۋشىلار كونتينگەنتىن كەڭەيتۋ ءۇشىن بيىل ءبىز قاتىسۋ جاسىن قايتا قارادىق. ەگەر وتكەن جىلى جوباعا 59 جاستان اسقان ادامدار عانا قاتىسا السا، بيىل جاس شەگى 50 جاسقا دەيىن تومەندەتىلدى، بۇل 9,4 مىڭ ەگدە جاستاعى ازاماتتى قامتۋعا مۇمكىندىك بەردى، ونىڭ 54 پايىزى - 50 جاستان اسقان ايەل. جۇمىس ورىندارىن جۇمىس بەرۋشىلەر ۇسىنادى، قاتىسۋشىلار بىلىكتىلىكتەرىنە قاراي ءوز بەتىنشە تاڭداۋعا قۇقىلى»، - دەدى تامارا دۇيسەنوۆا.
سونىمەن قاتار، ايەلدەردى ۇلتتىق جوبالار شەڭبەرىندە جۇمىسقا ورنالاستىرۋ تۋرالى حاباردار ەتتى.
«جۇمىسپەن قامتۋعا جاردەمدەسۋدىڭ تاعى ءبىر بەلسەندى شاراسى - بيزنەس-يدەيالاردى ىسكە اسىرۋعا مەملەكەتتىك گرانتتار بەرۋ. ناۋرىزدا گرانتتاردى ءبولۋدىڭ I كەزەڭى ءوتتى، ونىڭ ناتيجەلەرى بويىنشا مەملەكەتتىك گرانتتاردى 2564 ادام الدى، گرانت الۋشىلاردىڭ 62,4 پايىزى ايەل بولدى.
رەسپۋبليكا بويىنشا گرانت الۋشىلاردىڭ باسىم كوپشىلىگى كوپ بالالى وتباسىلار قاتارىنان 1384 ستيپەنديات (ونىڭ ىشىندە 917 ايەل)، مۇگەدەكتىگى بار ادامدار اراسىنان 494 ادام (168 ايەل)، مۇگەدەكتىگى بار بالالاردىڭ قامقورشىلار تىزىمىنەن 306 ادام (239 ايەل)، اتاۋلى الەۋمەتتىك كومەك الاتىن 176 ادام (127 ايەل)»، - دەپ حابارلادى تامارا دۇيسەنوۆا.
سونداي-اق، مينيستر مەملەكەت باسشىسىنىڭ تاپسىرماسىن ورىنداۋ اياسىندا بيىلدان باستاپ ەنگىزىلگەن جاستاردىڭ جىلدىق 2,5 پايىز كاسىپكەرلىك باستامالارىن قولداۋ ءۇشىن جەڭىلدەتىلگەن ميكروكرەديت بەرۋ تۋرالى ەگجەي- تەگجەيلى ايتىپ بەردى.
«2023-جىلعا ارنالعان رەسپۋبليكالىق بيۋجەتتەن 5796 جاس كاسىپكەرگە 5 ميلليون تەڭگەدەن ميكروكرەديت بەرۋ ءۇشىن 29 ميلليارد تەڭگە قاراستىرىلعان. ميكروكرەديتتەر اگروكرەديتتىك كورپوراتسيا ارقىلى بەرىلەدى. بۇگىنگى تاڭدا جالپى سوماسى 5,3 ميلليارد تەڭگەگە 1118 ءوتىنىم كەلىپ ءتۇستى، ونىڭ ىشىندە كوميسسيا جالپى سوماسى 482,5 ميلليون تەڭگەگە 102 ءوتىنىمدى ماقۇلدادى. بۇدان باسقا، 420 ءوتىنىم اگروكرەديتتىك كورپوراتسيانىڭ وڭىرلىك فيليالدارىندا قارالىپ جاتىر، 149 ءوتىنىم پىسىقتاۋعا قايتارىلدى، 448 ءوتىنىم وڭىرلىك كوميسسيالاردىڭ قاراۋىندا بولسا، 26 ءوتىنىم بويىنشا كوميسسيالار ناقتى بيزنەس-جوسپارلاردىڭ بولماۋىنا بايلانىستى ميكروكرەديتتەر بەرۋدەن باس تارتۋ تۋرالى شەشىم قابىلدادى»، - دەپ حابارلادى تامارا دۇيسەنوۆا.
