14:57, 01 - اقپان 2017 | GMT +6
قىتايدا سالماعى 50 كەلى، ۇزىندىعى 2 مەترگە جەتكەن بورسىق قاڭقاسى تابىلدى
استانا. قازاقپارات - قىتايدىڭ وڭتۇستىك- باتىسىنداعى يۋننان پروۆينسياسىنان شامامەن 6 ميلليون جىل بۇرىن ءومىر سۇرگەن بەيمالىم بورسىققا نەمەسە كامشاتقا ۇقسايتىن اڭ قاڭقاسى تابىلدى، دەپ حابارلادى شينحۋا اگەنتتىگى.
سۇيەكتەر اراسىنان باس سۇيەك مەن قاڭقا بولىكتەرى جاقسى ساقتالعان. ول شامامەن 50 كەلى بولعان جانە ۇزىندىعى ەكى مەترگە دەيىن جەتكەن. ياعني، قازىرگى كامشاتتان نە بورسىقتان ەكى ەسە ۇلكەن، قاسقىرمەن شامالاس. كومپيۋتەرلىك توموگرافيا ارقىلى باس سۇيەكتى قالپىنا كەلتىرگەن عالىمدار ءتىس پەن باس سۇيەكتىڭ قۇرىلىسى قازىرگى كامشات پەن بورسىقتارعا ءتان ەكەنىن انىقتادى. لوس- اندجەلەستەگى جاراتىلىس تاريحى مۋزەيى ومىرتقالى پالەونتولوگيا ءبولىمىنىڭ باسشىسى ۋان شياومين شىعىس ازيادا ءومىر سۇرگەن بورسىقتىڭ بۇل ءتۇرىنىڭ جويىلىپ كەتكەنىن ايتتى.
