رۋمىنيانىڭ وڭتۇستىك- باتىسىندا 5,7 بالدىق جەر سىلكىنىسى بولدى
بۇل تۋرالى جەر فيزيكاسىنىڭ دامۋىن زەرتتەۋ ۇلتتىق ينستيتۋتى NIEP مالىمدەدى، دەپ حابارلايدى قازاقپارات سينحۋا اگەنتتىگىنە سىلتەمە جاساپ.
بۇل رۋمىنيادا 2018 -جىلدىڭ 28- قازانىنان بەرى تىركەلگەن ەڭ كۇشتى ءزىلزالا بولدى، ول كەزدە جەراستى ءدۇمپۋىنىڭ ماگنيتۋداسى 5,8 بولعان ەدى.
تەربەلىس وشاعى جاقىندا عانا 5,2 بالدىق جەر سىلكىنىسى بولعان تاۋلى ايماقتا 40 شاقىرىم تەرەڭدىكتە جاتىر.
ءدۇمپۋ جەراستى وشاعىنان وڭتۇستىك- شىعىسقا قاراي 300 شاقىرىم جەردە ورنالاسقان ەل استاناسى بۋحارەستتە انىق سەزىلگەن. قۇرباندار تۋرالى ازىرگە اقپارات جوق، دەگەنمەن وشاق ايماعىنداعى اۋداندارعا ايتارلىقتاي شىعىن اكەلدى، ءبىر اۆتوكولىك عيماراتتاردىڭ توبەسىنەن قۇلاعان قيراندىلاردىڭ استىندا قالدى.
كەيىنگى كۇندەرى رۋمىنيادا ءبىرقاتار جەر سىلكىنىسى تىركەلدى - جاقىندا التاۋى بولسا، بۇگىن بەسەۋ تىركەلدى.
رۋمىنيا ەۋروپاداعى بەلسەندى سەيسميكالىق ايماقتىڭ بىرىنە جاتادى. ەلدە تەرەڭدىگى 70-200 شاقىرىم بولاتىن، ماگنيتۋداسى 7,0-دەن 7,8-گە دەيىن جەتەتىن بىرنەشە ءزىلزالا تىركەلگەن. 1977 -جىلى ناۋرىزدا بولعان 7,2 بالدىق ءزىلزالا سالدارىنان مىڭنان اسا ادام قازا تاۋىپ، مىڭداعان ۇيلەر قيراعان.
رۋمىنيا مەن تۇركيا ءتۇرلى تەكتونيكالىق تاقتادا ورنالاسقانىمەن تۇركيا مەن سيريادا جويقىن ءزىلزالا بولعان 6-اقپان تاڭدا رۋمىنيادا دا قاتارىنان 5 جەر سىلكىنىسى تىركەلگەن. ەڭ كۇشتىسىنىڭ ماگنيتۋداسى ريحتەر شكالاسى بويىنشا 4,6-عا جەتتى.
فوتو: static.vkurse.kz
اۆتور
بالنۇر قوجاگەلدى
