اتىراۋدا سالماعى 5,7 كەلى بولاتىن الىپ بالا دۇنيەگە كەلدى
وبلىستىق دەنساۋلىق ساقتاۋ باسقارماسى باسپا ءسوز قىزمەتىنىڭ مالىمەتىنشە، الىپ نارەستە وبلىستىق پەريناتالدىق ورتالىعىندا ومىرگە كەلگەن.
«قازىر الىپ بالانىڭ دا، ونى ومىرگە اكەلگەن اناسىنىڭ دا جاعدايى جاقسى. الىپ نارەستە - وتباسىنداعى ءتورتىنشى بالا. ءسابيدىڭ سالماعى ءىرى بولعان سوڭ، دارىگەرلەر اناسىنا كەسار تىلىگى ارقىلى وتا جاسادى. ول - بيىل وڭىردە دۇنيە ەسىگىن اشقان العاشقى الىپ بالا. ونىڭ سالماعى - 5700 گرام، ال، بويى - 64 سانتيمەتر»، - دەپ حابارلادى باسقارمانىڭ باسپا ءسوز قىزمەتى.
دارىگەرلەردىڭ ايتۋىنشا، مەديتسينادا نارەستەنىڭ سالماعى 4 كەلىدەن اسسا، ءىرى، ال، 5 كەلىدەن جوعارى بولسا، الىپ سانالادى.
باسپا ءسوز قىزمەتىنىڭ دەرەگىنە قاراعاندا، كەشە، 20- قاراشادا 34 ءسابي دۇنيە ەسىگىن اشقان. ونىڭ ىشىندە ءبىر ەگىز بار.
«سايلاۋ كۇنى ومىرگە كەلگەن نارەستەلەردىڭ 19 ى ۇل، 15 ءى قىز. انالار مەن سابيلەردىڭ دەنساۋلىعى قالىپتى، ءبارى دە دارىگەرلەردىڭ ءجىتى باقىلاۋىندا الىندى»، - دەپ ءمالىم ەتتى باسقارمانىڭ باسپا ءسوز قىزمەتىنەن.
بۇدان بۇرىن اتىراۋدا بيىل 96 ەگىز ومىرگە كەلگەنىن حابارلاعان ەدىك.
وبلىستىق پەريناتالدىق ورتالىعى ديرەكتورىنىڭ ورىنباسارى الميرا سابىرعاليەۆانىڭ ايتۋىنشا، بيىلعى 9 ايدا 6796 ءسابي دۇنيەگە كەلگەن.
ونىڭ ىشىندە 96 ەگىز بەن ءبىر ۇشەم تىركەلگەن.
ۇشەم 6- قىركۇيەكتە دۇنيەگە كەلگەن ۇشەمنىڭ ەكەۋىنىڭ سالماعى - 1 كەلى 800 گرام، ءۇشىنشىسى - 2 كەلى 200 گرام.
جاس وتباسى ەسەت قۇمار مەن ايانگۇل ءسابيتوۆا جاڭا تۋعان ۇشەمگە احماد، باتىرحان، يسمايل ەسىمىن بەرگەن.
