اقتوبەدە 5 توننا باۋىرساق پەن 7 توننا ناۋرىز كوجە تاراتىلدى
اقتوبەدە ناۋرىز مەرەكەسى 21-22 - كۇندەرى ۇيىمداستىرىلدى. تۇڭعىش پرەزيدەنت اتىنداعى ورتالىق ساياباقتا «شاتتان حالقىم، ءاز ناۋرىز كەلدى!» اتتى مەرەكەلىك كونسەرت ءوتتى. وبلىس اكىمى بەردىبەك ساپاربايەۆ اقتوبەلىكتەردى ناۋرىز مەرەكەسىمەن قۇتتىقتادى.
«ناۋرىز - قازاقستاندا تۇرىپ جاتقان بارلىق ۇلتتىڭ مەرەكەسى. كۇننىڭ سالقىندىعىنا قاراماستان ءار ۇلت وكىلى ورتالىق الاڭعا شىعىپ، ورتاق مەرەكەنى اتاپ ءوتىپ جاتىر. اقتوبەلىكتەر جىلدى جاقسى قارسى الدى. حالقىمىزدىڭ تۇرمىسى، تىرلىگى جىل وتكەن سايىن جاقسارىپ كەلەدى. ەڭ نەگىزگىسى، ەلىمىزدە بەرەكە، ىنتىماق بار»، - دەدى ب. ساپاربايەۆ.
ناۋرىز مەرەكەسىنە ۇلتتىق تاعامتانۋ اكادەمياسىنىڭ پرەزيدەنتى تورەگەلدى شارمانوۆ، اكادەميك جاقسىلىق دوسقاليەۆ پەن ۇلتتىق نەيروحيرۋرگيا ورتالىعىنىڭ پرەزيدەنتى سەرىك اقشولاقوۆ قاتىستى. مەيماندار اقتوبەدە تىگىلگەن اعاش ۇيگە كىرىپ، داستارحاننان ءدام تاتتى. مەرەكە كۇنى اقتوبە قالاسىنداعى 7 الاڭعا 70 اعاش ءۇي تىگىلدى. ءىرى مۇناي كومپانيالارى مەن جوعارى وقۋ ورىندارى، مەملەكەتتىك مەكەمەلەر مەن كوممۋنالدىق كومپانيالار قالا تۇرعىندارى ءۇشىن اعاش ءۇيدى ساندەدى.
«ءار كيىز ءۇي ۇلتتىق ناقىش ستيلىندە بەزەندىرىلىپ، كيىز ۇيلەردە قازاق حالقىنىڭ سالتتارى مەن داستۇرلەرىن، تۇرمىستىق ەرەكشەلىكتەرىن بەينەلەيتىن بۇيىمدار قويىلىپ، داستارحان جايىلدى. باۋىرساق پەن ناۋرىز كوجە تاراتىلدى. اعاش ۇيلەردىڭ الدىندا مەرەكەلىك باعدارلامالار، سپورتتىق ويىندار ۇيىمداستىرىلدى»، - دەدى وبلىستىق مادەنيەت باسقارماسىنىڭ باسشىسى مارجان قورعانبايەۆا.
سونىمەن قاتار، ءار اۋىلدا التىباقان قۇرىلىپ، بالالار مەن جاستاردىڭ كوڭىل كوتەرۋىنە جاعداي جاسالدى.
اۆتور: التىناي ساعىندىقوۆا
