سوت ارقىلى بانكروتتىق ءراسىمى قارىز 5,5 ميلليون تەڭگەدەن اسقاندا ىسكە قوسىلادى

«سوت ارقىلى بانكروت دەپ جاريالاۋ باعىتىنا توقتالساق، ازاماتتار قارىزى 1600 ا ە ك - تەن اسقان جاعدايدا ىسكە اسىرىلادى (2023-جىلى - 5 ميلليون 520 مىڭ تەڭگە). سوت ارقىلى بانكروتتىق كەزىندە بورىشكەردىڭ مۇلكى ساۋداعا شىعارىلادى. اتاپ ايتقاندا، سوت بانكروتتىعى بارىسىندا كرەديتور بورىشكەردىڭ جالعىز تۇرعىن ءۇيىن وسى باسپانا كەپىل نىساناسى بولعان جاعدايدا عانا الىپ قويۋعا قۇقىلى. ودان تۇسكەن قاراجات بەلگىلەنگەن كەستەگە سايكەس كرەديتورلار الدىنداعى قارىزدى وتەۋگە جىبەرىلەدى»، - دەدى ەرجان ءبىرجانوۆ ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.

ونىڭ ايتۋىنشا، اليمەنت، ادامنىڭ ءومىرى مەن دەنساۋلىعىنا كەلتىرىلگەن زيان بويىنشا قارىزدار، قىلمىستىق قۇقىق بۇزۋشىلىقتار بويىنشا زالالدى وتەۋ، سونداي-اق سوت شەشىمى بويىنشا ءوندىرۋ الۋ ماقساتىندا بيۋجەتكە اۋدارىلاتىن تولەمدەر ەسەپتەن شىعارىلمايدى.

«سوت بانكروتتىعى ءراسىمىن قارجى باسقارۋشىلارى جۇزەگە اسىرادى. ولاردىڭ قاتارىنا كاسىبي بۋحگالتەرلەر، زاڭ بويىنشا كەڭەسشىلەر، اۋديتورلار، كىرەدى»، - دەدى ۆيتسە-مينيستر.

مۇنىمەن قوسا، جەكە ادامداردىڭ بانكروتتىعى تۋرالى زاڭ اياسىندا تولەم قابىلەتىن قالپىنا كەلتىرۋ قامتىلعان. ياعني تۇراقتى تابىس بولعان جاعدايدا، سوتتا قارىزدى ءبولىپ تولەۋ مۇمكىندىگى (5 جىلعا دەيىن) ەسكەرىلگەن. قالپىنا كەلتىرۋ جوسپارىن قارجى باسقارۋشىسى بىرلەسىپ ازىرلەيدى جانە سوتتا بەكىتىلەدى. بۇل ءراسىمنىڭ ارتىقشىلىعىنا توقتالسام، قارىزى بار ادام «بانكروت» ساناتىنا كىرمەيدى.

اتاپ ايتقاندا، بانكروت دەپ تانىلعان ادام 5 جىل نەسيە الا المايدى. سونىمەن بىرگە، 7 جىلدىڭ ىشىندە ءوزىن قايتادان بانكروت دەپ تانۋعا جاتپايدى. ولاردىڭ قارجىلىق جاعدايى بانكروتتىقتان كەيىن ءۇش جىل بويى تەكسەرىلەدى.

ال تولەم قابىلەتىن قالپىنا كەلتىرۋ كەزىندە، مۇنداي سالدار بولمايدى.

بۇدان بۇرىن حابارلانعانداي، قارىزى جابىلماعان ادامدار 2023-جىلدىڭ 3- ناۋرىزىنان باستاپ بانكروتتىققا ءوتىنىش بەرە الادى.