قازاقستاندا جەڭىل اۆتوكولىكتەر سانى 5 ميلليون 42,4 مىڭ بىرلىكتى قۇرادى

استانا. قازاقپارات - 2015-جىلعى 1- قاراشاداعى جاعداي بويىنشا ەلىمىزدە جەڭىل اۆتوكولىكتىڭ قولدا بارى 5 ميلليون 42,4 مىڭ بىرلىكتى قۇرادى.

بۇل تۋرالى ق ر ۇلتتىق ەكونوميكا مينيسترلىگىنىڭ ستاتيستيكا كوميتەتىنەن حابارلاندى.

ستاتيستيكالىق مالىمەتتەرگە قاراعاندا، 2015-جىلعى قاڭتار-قازاندا رەسپۋبليكادا 613421 جەڭىل اۆتوموبيل تىركەلگەن. بۇل وتكەن جىلعى ءتيىستى كەزەڭمەن سالىستىرعاندا 29,3 پايىزعا جوعارى كورسەتكىش. سونىمەن قاتار، ەسەپتى كەزەڭدە ەلىمىز بويىنشا ەڭ كوپ جەڭىل اۆتوكولىكتەر تىركەلگەن ءوڭىر وڭتۇستىك قازاقستان (77 مىڭ 338 بىرلىك) وبلىسى، الماتى قالاسى (73 مىڭ 668 بىرلىك) جانە الماتى وبلىسى (72 مىڭ 612 بىرلىك) بولىپ وتىر.

اۆتور: قانات مامەتقازى ۇلى