قازاقستاندا جىل باسىنان اۆتوكولىكپەن 5,3 ميلليون جولاۋشى تاسىمالداندى
قازاقپارات بۇل تۋرالى ق ر يندۋستريا جانە ينفراقۇرىلىمدىق دامۋ مينيسترلىگىنە سىلتەمە جاساپ حابارلايدى.
بيىلعى جىل باسىنان اۆتوموبيل كولىگى سالاسىندا رەسپۋبليكا ىشىندە 5,3 ميلليون جولاۋشى، 675,3 ميلليون توننا جۇك تاسىمالدانعان. ال حالىقارالىق قاتىناستا 2,3 ميلليون توننا جۇك تاسىمالدانسا، ونىڭ ىشىندە: ەكسپورت - 640 مىڭ توننا، يمپورت - 1,7 ميلليون توننا بولدى. سونىمەن قاتار، 380 مىڭ توننا ترانزيتتىك جۇك تاسىمالداندى.
«2020-جىلدان باستاپ الەۋمەتتىك ماڭىزدى باعىتتاردا قىزمەت ەتەتىن تاسىمالداۋشىلار قوسىمشا قۇن سالىعىن تولەۋدەن 3 جىلعا بوساتىلادى. وسىنى كوزدەيتىن زاڭ جوباسى قازىرگى كەزدە ءماجىلىستىڭ قاراۋىندا. بۇگىندە اۆتوموبيل تاسىمالدارى سالاسىندا 3,5 مىڭعا جۋىق كاسىپورىن جۇك تاسىمالداۋمەن اينالىسادى. 1 مىڭعا تارتا كاسىپورىن تۇراقتى اۆتوبۋس تاسىمالدارىن جۇزەگە اسىرادى. ولاردىڭ 17,5 مىڭنان استام اۆتوكولىگى بار»، - دەلىنگەن اقپاراتتا.
ق ر يندۋستريا جانە ينفراقۇرىلىمدىق دامۋ مينيسترلىگىنىڭ الەمدە COVID-2019 ينفەكتسياسىنىڭ تارالۋىنا جانە ەلىمىزدە توتەنشە جاعدايدىڭ ەنگىزىلۋىنە بايلانىستى جىل باسىنان قابىلداعان شارالارى:
- قىتاي، رەسەي، قىرعىزستان، وزبەكستان جانە موڭعوليامەن 117 تۇراقتى اۆتوبۋس باعىتى توقتاتىلدى؛
- حالىقارالىق تۇراقتى ەمەس جانە ترانزيتتىك جولاۋشىلار تاسىمالىنا تىيىم سالىنادى؛
- كارانتين ەنگىزىلگەن وڭىرلەرگە/وڭىرلەردەن جولاۋشىلاردى وبلىسارالىق جانە قالاارالىق تاسىمالداۋ توقتاتىلدى؛
- كارانتين ەنگىزىلگەن ايماقتاردا اۆتوۆوكزالدار مەن اۆتوستانتسيالاردىڭ جۇمىسى توقتاتىلدى؛
- وبلىستاردىڭ، نۇر-سۇلتان، الماتى جانە شىمكەنت قالالارى اكىمدىكتەرىنە توتەنشە جاعداي رەجيمى كەزەڭىندە وڭىرلەردە اۆتوكولىكپەن جولاۋشىلار تاسىمالداۋدى شەكتەۋ بويىنشا ۇسىنىمدار جولداندى؛
- شەت مەملەكەتتەردىڭ قۇزىرەتتى كولىك ورگاندارىنا حالىقارالىق قاتىناستا جۇكتەردى تاسىمالداۋ كەزىندە سانيتارلىق ءىس-شارالاردى ساقتاۋ قاجەتتىگى تۋرالى ۇسىنىمدار جىبەرىلدى؛
- قىتايمەن، رەسەيمەن، قىرعىزستانمەن جانە وزبەكستانمەن مەملەكەتتىك شەكارا ارقىلى 20 جەكە اۆتوموبيل وتكىزۋ پۋنكتى ۋاقىتشا جابىلدى.
ال حالىقارالىق جانە رەسپۋبليكاىشىلىك قاتىناستا جۇك اۆتوكولىك قۇرالدارىمەن جۇك تاسىمالداۋعا شەكتەۋلەر ەنگىزىلمەگەنىن ايتا كەتۋ كەرەك. قازىرگى ۋاقىتتا باعدارلاردىڭ قىسقارۋىنا نەمەسە توقتاتىلۋىنا بايلانىستى قازاقستاندىق اۆتوبۋس تاسىمالداۋشىلارىنىڭ احۋالىنا ساراپتامالىق باعالاۋ جۇرگىزىلىپ، سالانى قولداۋعا قاتىستى ۇسىنىلاتىن شارالار قاراستىرىلىپ جاتىر.
