ەلىمىزدىڭ 5 اۆتوجولىن سالۋعا ءارى جاڭعىرتۋعا 321,3 ميلليارد تەڭگە جۇمسالادى - ب. ساعىنتايەۆ
بۇل تۋرالى بۇگىن «قازاقستان-2050» دەموكراتيالىق كۇشتەردىڭ جالپى ۇلتتىق كواليتسياسىنىڭ وتىرىسىندا ق ر پرەمەر- ءمينيسترىنىڭ ءبىرىنشى ورىنباسارى باقىتجان ساعىنتايەۆ ءمالىم ەتتى.
ونىڭ اتاپ وتۋىنشە، ق ر پرەزيدەنتىنىڭ تاپسىرماسىنا سايكەس، 2015-2019 - جىلدارعا دەيىنگى ينفراقۇرىلىمدى دامىتۋدىڭ مەملەكەتتىك باعدارلاماسى ازىرلەنۋدە. اتالعان قۇجات اعىمداعى جىلدىڭ سوڭىندا قابىلدانباق. ونى دايىنداۋ ىسىندە ۇكىمەت قارقىندى جۇمىستار جۇرگىزۋدە.
«ورتالىق- وڭتۇستىك، ورتالىق- شىعىس جانە ورتالىق- باتىس باعىتتارى بويىنشا رەسپۋبليكالىق ماڭىزداعى جولداردى سالۋ جانە جاڭعىرتۋعا 321,3 ميلليارد تەڭگە بولىنەدى. ونىڭ ىشىندە 2015 - جىلى 178 ميلليارد جانە 2016 - جىلى 143,3»، - دەدى ول.
ب. ساعىنتايەۆتىڭ ايتۋىنشا، جولداۋدا جۇكتەلگەن مىندەتتەرگە سايكەس، جالپى ۇزاقتىعى 5452 شاقىرىمدى قۇرايتىن 5 ءىرى اۆتوجولدىڭ قۇرىلىسى باستالادى.
«ولار 1300 شاقىرىمدىق استانا- الماتى، 950 شاقىرىمدىق استانا- وسكەمەن، 1600 شاقىرىمدىق استانا- اقتوبە- اتىراۋ- استراحان، 712 شاقىرىمدىق الماتى- وسكەمەن، 2890 شاقىرىمدىق قىزىلوردا- جەزقازعان- قاراعاندى- پاۆلودار جولدارى. جول قۇرىلىسى جوبالارىن جۇزەگە اسىرۋ جاڭا 200 مىڭ جۇمىس ورنىن اشۋعا مۇمكىندىك بەرەدى»، - دەدى ۇكىمەت باسشىسىنىڭ ءبىرىنشى ورىنباسارى.
ونىڭ سوزىنە قاراعاندا، «سامۇرىق- قازىنا» قورىن كاپيتالداندىرۋ ارقىلى كاسپيدەگى ايلاق ينفراقۇرىلىمىنا جانە تەمىر جول قۇرىلىسىنا 46,2 ميلليارد تەڭگە باعىتتالادى. ونىڭ 19,8 ميلليارد تەڭگەسى 2015 - جىلى، ال 26,4 ميلليارد تەڭگەسى 2016 - جىلى كادەگە جاراتىلادى. بۇدان بولەك، شۋ- الماتى-1 بولىگىندەگى ەكىنشى تەمىر جول قۇرىلىسىنا 27,7 ميلليارد تەڭگە، بورجاقتى- ەرساي تەمىر جول جەلىسىنە 6,7 ميلليارد تەڭگە جۇمسالادى.
اۆتور: مارلان جيەمباي
