ەلباسى: الداعى 5 جىلدا «سامۇرىق- قازىنا» قورىنىڭ 3 كومپانياسى «فورشەن-500» تىزىمىنە كىرۋى ءتيىس
«5 جىلدان كەيىن قوردىڭ كەمىندە 3 كومپانياسى ءىرى «فورشەن-500» كومپانياسى تىزىمىنە كىرۋى ءتيىس. قازىرگى ۋاقىتتا بۇل ساننىڭ باسىم كوبىن باتىس كومپانيالارى ۇستاپ تۇر»، - دەدى مەملەكەت باسشىسى.
ەلباسىنىڭ اتاپ وتۋىنشە، مۇنداي كومپانيالاردىڭ جىلدىق تابىسى 5 تەن 500 ميلليارد دوللارعا دەيىنگى قارجىنى قۇراۋدا.
«دەگەنمەن، سوڭعى ۋاقىتتا ازيالىق كومپانيالاردىڭ دا ۇلەسى ارتىپ كەلەدى. 2003-2014 - جىلدارى ارالىعىندا بۇل تىزىمدەگى قىتايلىق كومپانيالاردىڭ سانى 8 دەن 95 كە دەيىن ارتتى. ال CNPC قىتاي مەملەكەتتىك مۇناي كورپوراسياسى العاشقى بەستىككە كىردى. سونداي- اق تىزىمدە 8 رەسەيلىك كومپانيا دا بار»، - دەدى ن. نازاربايەۆ.
ق ر پرەزيدەنتىنىڭ ايتۋىنشا، «فورشەن» تىزىمىنە كىرۋدەگى نەگىزگى ولشەم تابىس كولەمى مەن قارجى ەسەپتىلىگىنىڭ اشىقتىعى بولىپ سانالادى.
«ءبىزدىڭ كومپانيالار الەمدىك ءىرى ويىنشىلارمەن ءبىر قاتاردا تۇرۋى ءۇشىن قورعا ەڭ بىرىنشىدەن ءوزىنىڭ تيىمدىلىگىن جانە ونىمدىلىگىن ايتارلىقتاي كوتەرۋى ءتيىس. بۇل رەتتە ونىمدىلىك قازىر ءبىز ماقتانىپ جۇرگەندەي 2,3 پايىز ەمەس الداعى 5 جىلدا كەمىندە 30-40 پايىزعا سەرپىندى بولۋى قاجەت. مەن مۇنىڭ تۇبەگەيلى قولجەتىمدى ەكەندىگىن بىلەمىن. مۇنىڭ ەش قيىندىعى جوق»، - دەدى ن. نازاربايەۆ.
ەلباسىنىڭ اتاپ وتۋىنشە، اتالعان ماقساتتارعا قول جەتكىزۋ ءۇشىن ءوندىرىس، باسقارۋ تەحنولوگيالارىنا جانە نارىقتىق ساراپتاماعا يە ستراتەگيالىق سەرىكتەستەر، ينۆەستورلار تارتۋ قاجەت.
«مۇنىڭ ارقاسىندا قور كومپانيالارى سىرتقى نارىقتارعا، ءبىرىنشى كەزەكتە كەدەن وداعى ەلدەرى نارىعىنا شىعىپ، باسەكەلەس بولۋى كەرەك»، - دەدى ق ر پرەزيدەنتى.
اۆتور: مارلان جيەمباي
