ارالدا 5 ميلليون تەڭگە ءبولىنىپ، 2008 ءيت پەن مىسىقتىڭ كوزىن جويدى

قىزىلوردا. قازاقپارات - بيىل ارالدا يەسىز ءيت-مىسىقتاردى اۋلاۋعا جەرگىلىكتى بيۋدجەتتەن 5 ميلليون تەڭگە ءبولىنىپ، اعىمداعى جىلدىڭ ءبىرىنشى جارتىسىندا 2008 حايۋاناتتىڭ كوزى جويىلدى، دەپ حابارلادى اۋداندىق اكىمدىكتىڭ باسپا ءسوز قىزمەتىنەن.

ودان بولەك 110,1 ميلليون تەڭگە - اسا قاۋىپتى اۋرۋلاردىڭ الدىن الۋ، 8,2 ميلليون تەڭگە ەنزووتيالىق شارالاردى ىسكە اسىرۋعا قارالعان. «بۇگىندە 11 مال قورىمى(مالدىڭ ولەكسەلەرىن تاستايتىن ورىن) بار. بيىل ارال قالاسى مەن توقاباي اۋىلىندا تاعى 2 قورىم سالۋعا 2,4 ميلليون تەڭگە ءبولىنىپ وتىر»، - دەلىنگەن حابارلامادا.

سونىمەن قاتار بارلىق ۆەتەرينارلىق قوسىنداردى عيماراتتارمەن قامتاماسىز ەتۋ ءۇشىن وبلىستىق بيۋدجەتتەن 47 ميلليون تەڭگە ءبولىندى. قازىرگى كەزدە تەندەر جۇرگىزىلۋدە.

اۆتور: ەلۋباي اۋەزوۆ