فۋتبول: بۇرىن بەلگيا برازيليانى 5:1 ەسەبىمەن جەڭگەن
برازيليا- بەلگيا ماتچى وسى چەمپيوناتتىڭ ەڭ قىزىقتى كەزدەسۋلەرىنىڭ ءبىرى بولماق، دەپ حابارلايدى قازاقپارات ءتىلشىسى.
وعان بىرنەشە سەبەپ بار. ەڭ الدىمەن، ەكى قۇراما ويىنشىلارىنىڭ كوپشىلىگى ءبىر كلۋب ساپىندا ونەر كورسەتەتىنى نازار اۋدارتادى. يسپانيانىڭ «بارسەلونا» كومانداسىندا وينايتىن كوۋتينو، پاۋلينو (برازيليا) - ۆەرمالەن (بەلگيا)؛ انگليانىڭ «چەلسي» كومانداسى ساپىنداعى ۆيلليان - كۋرتۋا، ازار، باتشۋاي؛ «ليۆەرپۋل» (انگليا) مۇشەلەرى فيرمينو - مينولە؛ انگليانىڭ تاعى ءبىر كومانداسى «مانچەستەر سيتي» قۇرامىنداعى گابريەل جەسۋس، فەرناندينو، ەدەرسون - دە برەينە، كومپاني؛ فرانسيانىڭ «پ س ج» كومانداسىندا جۇرگەن نەيمار، تياگو سيلۆا، ماركينوس - مەنە سەكىلدى فۋتبولشىلار ءبىر- ءبىرىن وتە جاقسى بىلەدى.
وسى ويىننىڭ تەورياداعى فاۆوريتى رەتىندە كورسەتىلەتىن برازيليادا قۇرام جاعىنان ءبارى ويداعىداي. كەشە ويىن الدىنداعى باسپا ءسوز ءماسليحاتىندا باس باپكەر تيتە قورعاۋشى مارسەلو مەن جارتىلاي قورعاۋشى دۋگلاس كوستانىڭ نەگىزگى قۇرام ساپىندا الاڭعا شىعا الاتىنىن مالىمدەدى.
بۇگىنگى برازيليا جۇلدىزدى فۋتبولشىلارى جاعىنان دا، ويىنشىلاردىڭ دەنە دايىندىعى جاعىنان دا وسى چەمپيوناتتا كوپتەگەن قۇرامانى باسىپ وزادى. ماسەلەن، فيليپپە كوۋتينو كومانداداعى ەڭ كوپ جۇگىرگەن فۋتبولشى اتانىپ وتىر. ول وتكەن ءتورت ويىندا 41,4 كيلومەتر جۇگىرگەن. ال باس جۇلدىز نەيمار ءتورت ويىندا قارسىلاستار قاقپاسىنا 12 سوققى باعىتتاپ، چەمپيوناتتاعى ەڭ ۇزدىك ناتيجەنى كورسەتىپ وتىر. سول ون ەكىنىڭ ەكەۋى گولعا اينالعان.
ءبىراق كوماندا رەتىندە بەلگيانىڭ ناتيجەلەرى مەيلىنشە كوز تارتادى. «قىزىل سويقاندار» سوڭعى رەت سوناۋ 2016 -جىلدىڭ قىركۇيەگىندە يسپانيادان جەڭىلگەن. سودان بەرگى 23 ويىندا جەڭىلمەي كەلەدى، ال الەم چەمپيوناتىنىڭ سوڭعى ءتورت ويىنىندا جەڭىسكە جەتكەن. تۋرنيردەگى 12 گولى ولاردىڭ ەڭ ۇزدىك كورسەتكىش بولىپ وتىر.
بۇدان تىس، بەلگيا قارسىلاستار قاقپاسىنا قاراي 77 رەت تەپكەن، سول سوققىلاردىڭ 30 ى قاقپاعا تۋرا بارعان. بۇل جاعىنان دا روبەرتو مارتينەس شاكىرتتەرى الدىنا جان سالماي كەلەدى.
تاعى ءبىر قىزىق جايت، برازيليا قۇراماسىنىڭ الەم چەمپيوناتتارىنداعى سوڭعى التى جەڭىلىسى ەۋروپا وكىلدەرىنىڭ ۇلەسىنە تۋرا كەلەدى. 2014 -جىلى گەرمانيا مەن گوللانديادان، 2010 -جىلى گوللانديادان، 2006 -جىلى فرانتسيادان، 1998 -جىلى فرانتسيادان، ءتىپتى نورۆەگيادان ۇتىلىپ قالعان.
بەلگيالىقتاردى الەم چەمپيوناتتارىنىڭ پلەي-وفف كەزەڭىندە جارىستان شىعارىپ جىبەرگەندەر دە - وڭتۇستىك امەريكا قۇرامالارى، سونىڭ ىشىندە برازيليا بار. ولاردى ءتورت جىل بۇرىنعى شيرەك فينالدا ارگەنتينا ۇتقان، ال 2002 -جىلى 1/8 فينالدا برازيليا 2:0 ەسەبىمەن تىزە بۇكتىرگەن.
ياعني، بۇگىنگى ويىندا كوماندالاردىڭ بىرەۋىنىڭ سەرياسى بۇزىلاتىنى انىق.
تاريح دەمەكشى، بۇعان دەيىن ەكى قۇراما ءتورت مارتە - ءۇش رەت جولداستىق ماتچىندا، ءبىر رەت الەم چەمپيوناتىندا كەزدەسكەن. 1963 -جىلى وتكەن العاشقى ويىندا بەلگيالىقتار برازيليانى 5:1 ەسەبىمەن تالقانداعان. ءبىراق اراعا ەكى جىل سالىپ، ريو- دە- جانەيرودا برازيليا ەسە قايتاردى. 5:0 ەسەبىمەن اياقتالعان ويىندا فۋتبول كورولى پەلە كارەراسىنداعى سوڭعى جەتىنشى حەت- تريگىن تويلاعان بولاتىن. 1990 -جىلعى جولداستىق كەزدەسۋدە دە بەلگيا ءوز الاڭىندا 1:2 ەسەبىمەن جەڭىلىسكە ۇشىرادى. ال وڭتۇستىك كورەيا جانە جاپونيا جاسىل الاڭدارىندا وتكەن الەم چەمپيوناتىندا بولاشاق پەنتاكامپەوندار ريۆالدو مەن رونالدو گول سوعىپ، جەڭىستى جۇلىپ اكەتكەن.
جالپى، كوماندالار بۇگىنگى ماچتا بارىن سالماسا كەلەسى كەزەڭگە وتپەيتىنىن جاقسى تۇسىنەدى. ويىن قازان قالاسىنداعى «قازان ارەنا» ستاديونىندا بولادى. ونى قازاقستاننىڭ ەكى بىردەي تەلەارناسى - Qazsport جانە Qazaqstan 00:00-دەن باستاپ تىكەلەي ەفيردەن كورسەتەدى.
