استانادا 5 ينستيتۋتسيونالدىق رەفورمانى جۇزەگە اسىرۋدىڭ 100 ناقتى قادامى تالقىلاندى
فورۋم جۇمىسىنا وڭىرلەردەن كەلگەن وكىلدەر، ىشكى ساياسات، مادەنيەت، جاستار ساياساتى باسقارمالارىنىڭ باسشىلارى، قازاقستان حالقى اسسامبلەياسىنىڭ وڭىرلىك حاتشىلىقتارىنىڭ مەڭگەرۋشىلەرى، جوعارى وقۋ ورىندارىنىڭ رەكتورلارى، وبلىستىق باق جەتەكشىلەرى، عىلىمي-ساراپتامالىق قاۋىمداستىق وكىلدەرى قاتىستى.
فورۋم بارىسىندا بەس ينستيتۋتسيونالدىق رەفورمانى جۇزەگە اسىرۋ مىندەتتەرى مەن تەتىكتەرى تالقىعا سالىندى.
ق ر پرەزيدەنتى اكىمشىلىگى باسشىسىنىڭ ورىنباسارى ب. مايلىبايەۆتىڭ ايتۋىنشا، الەۋمەتتىك بلوك مينيسترىلكتەرى، جەرگىلىكتى اتقارۋشى ورگاندار جانە جالپى قازاقستاندىق قوعام الدىندا قادام-قاداممەن بەس رەفورمانى ىسكە اسىرۋ جانە ۇلت جوسپارىندا ەلباسى جۇكتەگەن ناقتى ماقساتتارعا قول جەتكىزۋ مىندەتى تۇر.
مەملەكەت باسشىسى كورسەتىپ وتكەندەي، ەلىمىزدىڭ باستى ماقساتى الەمنىڭ ەڭ وزىق وتىز ەلىنىڭ قاتارىنا كىرۋ جانە ەكونوميكالىق ىنتىماقتاستىق جانە دامۋ ۇيىمى ەلدەرىنىڭ ستاندارتتارىنا قول جەتكىزۋ بولىپ تابىلادى.
ب. مايلىبايەۆتىڭ اتاپ وتۋىنشە، «ۇلت جوسپارى- 100 ناقتى قادام» قوعام ءومىرىنىڭ باستى سالالارىن جاڭعىرتۋعا باعىتتالعان.
15 قادام مەملەكەتتىك اپارات كاسىبيلىگىن ارتتىرۋعا باعىتتالعان.
19 قادام - سوت جۇيەسى مەن قۇقىق قورعاۋ ورگاندارىنىڭ جۇمىسىن جاڭعىرتۋ بويىنشا ءتيىمدى ءىس- قيمىلدار.
50 قادام - جاڭا جوعارى تەحنولوگيالىق ەكونوميكالىق ءوسىم مەن ادام كاپيتالىن دامىتۋدى ىنتالاندىراتىن، قازاقستاندىقتاردىڭ ءومىر ساپاسىن جاقسارتۋعا باعىتتالعان ناقتى ءارى تۋرا شەشىمدەر.
6 قادام - جالپى قازاقستاندىق قوعام بىرلىگىنىڭ سايكەستىگىن، «ماڭگىلىك ەل» قۇندىلىقتارى جۇيەسىن دامىتۋدى بولجاپ وتىرعان سالماقتى شارالار.
10 قادام «اشىق ۇكىمەت» جۇمىسىنىڭ مەحانيزمدەرىن، مەملەكەتتىك ورگانداردىڭ اشىقتىعى مەن ەسەپ بەرۋشىلىگىن، قوعامدىق باقىلاۋ، ازاماتتىق قاتىسۋدى كۇشەيتۋدى جەتىلدىرۋدى قامتاماسىز ەتەدى.
كەڭەستىڭ جۇمىسىنا قازاقستان حالقى اسسامبلەياسى ءتوراعاسىنىڭ ورىنباسارى - ق ح ا حاتشىلىعىنىڭ مەڭگەرۋشىسى ە. توعجانوۆ، ءبىلىم جانە عىلىم ءمينيسترى ا. ءسارىنجىپوۆ، مادەنيەت جانە سپورت ءمينيسترى ا. مۇحامەدي ۇلى، قر پرەزيدەنتى جانىنداعى قازاقستاندىق ستراتەگيالىق زەرتتەۋلەر ينستيتۋتىنىڭ ديرەكتورى ە. كارين، قر پرەزيدەنتى جانىنداعى ورتالىق كوممۋنيكاتسيالار قىزمەتىنىڭ ديرەكتورى ە. باباقۇماروۆ قاتىستى.
شارا سوڭىندا ناقتى تاپسىرمالار مەن كەڭەستەر بەرىلدى.
