ەلىمىزدە ءۇش باعىتتاعى اۆتوجول رەكونسترۋكتسيالانىپ، 4 جولاقتى بولادى

كولىك ءمينيسترى مارات قارابايەۆ وڭىرلەرگە جاساعان جۇمىس ساپارىنان كەيىن ەلىمىزدەگى اۆتوجول سالاسىن دامىتۋ ماسەلەلەرى جونىندە كەڭەيتىلگەن كەڭەس وتكىزدى، دەپ حابارلايدى قازاقپارات ق ر كولىك مينيسترلىگىنىڭ باسپا ءسوز قىزمەتىنە سىلتەمە جاساپ.

القالى جيىن بارىسىندا اۆتوجول سالاسىن ودان ءارى دامىتۋ بويىنشا قالىپتاسقان جاعداي مەن الداعى ۋاقىتقا بەلگىلەنگەن جوسپارلار، اتاپ ايتقاندا باسىمدىق بەرىلگەن جوبالاردى ىسكە اسىرۋ، جولداردى رەكونسترۋكتسيالاۋعا ارنالعان جەرلەردى بەلگىلەۋ، سونداي-اق جول بويىندا جولاۋشىلارعا قىزمەت كورسەتەتىن نىساندار جەلىسىن كەڭەيتۋ بويىنشا وزەكتى ماسەلەلەر تالقىلاندى.

كەڭەيتىلگەن كەڭەسكە اۆتوموبيل جولدارى كوميتەتىنىڭ، «قازاۆتوجول» ۇ ك» ا ق باسشىلارى، وبلىس اكىمدەرىنىڭ ورىنباسارلارى، اۆتوجولداردىڭ قۇرىلىسىنا قاتىساتىن وتاندىق مەردىگەرلىك ۇيىمداردىڭ، سونداي-اق جانارماي قۇيۋ بەكەتتەرى مەن جول بويىنداعى سەرۆيس وبەكتىلەرىنىڭ قۇرىلىسىنا ينۆەستيتسيا قۇياتىن كومپانيالاردىڭ وكىلدەرى قاتىستى.

اتالعان سالانى دامىتۋدىڭ باسىمدىقتارى تۋرالى ايتا كەلە، ۆەدومستۆو باسشىسى 2029 -جىلعا دەيىن 4,7 مىڭ شاقىرىم جول سالۋ جانە رەكونسترۋكسيالاۋ جونىندەگى جوبالاردى كەزەڭ-كەزەڭىمەن ىسكە اسىرۋ جۇمىستارىن باستاۋ جوسپارلانىپ وتىرعانىن ايتتى. ول قازاقستاندىقتاردى ساپالى جولدارمەن قامتاماسىز ەتۋ مىندەتى مەملەكەت باسشىسى قاسىم-جومارت توقايەۆتىڭ ەرەكشە باقىلاۋىندا ەكەنىن جانە پرەزيدەنتتىڭ سايلاۋالدى باعدارلاماسىندا بەكىتىلگەنىن اتاپ ءوتتى.

سونىمەن بىرگە جاڭادان قۇرىلعان مينيسترلىكتىڭ باسشىسى «اقتوبە- ۇلعايسىن- قىزىلوردا» (1363 ك م)، «جەزقازعان- قاراعاندى» (513 ك م) جانە «سارىاعاش قالاسىن اينالىپ ءوتۋ» (102 ك م) اۆتوجولدارىن رەكونسترۋكتسيالاۋ جونىندەگى جوبالار باسىمدىق بەرىلەتىن جوبالاردىڭ قاتارىنا قوسىلعانى تۋرالى مالىمدەدى.

مارات قارابايەۆتىڭ ايتۋىنشا، اتالعان جولداردى 4 جولاقتى قوزعالىسپەن قامتاماسىز ەتىپ، I تەحنيكالىق ساناتقا اۋىستىرۋ تۋرالى شەشىم كولىك قوزعالىسى قارقىندىلىعىنىڭ ارتۋىنا بايلانىستى قابىلدانعان.

رەسپۋبليكانىڭ جول-كولىك الەۋەتىن ىسكە اسىرۋ جونىندەگى جوسپارلارعا سايكەس كولىك مينيسترلىگى رەسپۋبليكالىق ماڭىزى بار اۆتوجولدار بويىنداعى قىزمەت كورسەتۋ نىساندارىن دامىتۋ شەڭبەرىندەگى جۇمىستى بەلسەندى تۇردە جالعاستىراتىن بولادى.

بۇگىنگى تاڭدا ەلىمىزدە جول بويىنداعى سەرۆيس 1652 وبەكتىنى قامتىپ وتىر، ونىڭ 78 پايىزى ۇلتتىق ستاندارت تالاپتارىنا جاۋاپ بەرەدى. وسىلايشا، جىلدىڭ سوڭىنا دەيىن تاعى 78 نىساندى ىسكە قوسۋدى جوسپارلانىپ وتىر. ونىڭ ىشىندە 53 ى جەكە ينۆەستيتسيالاردى تارتۋ ەسەبىنەن ىسكە قوسىلاتىن بولادى. سونىمەن قاتار جولداردى قايتا جاڭارتۋ جانە جوندەۋ جوبالارى شەڭبەرىندە جاڭادان 25 سانيتارلىق-گيگيەنالىق توراپ ىسكە قوسىلماق. بۇل ۇلتتىق ستاندارتقا سايكەس كەلەتىن جول بويىنداعى سەرۆيس وبەكتىلەرىنىڭ ۇلەسىن 82 پايىزعا دەيىن ارتتىرادى.

بۇدان بولەك 2029 -جىلعا قاراي ستاندارتقا سايكەس كەلەتىن 200 دەن استام جاڭا نىسان سالۋ جوسپاردا بار.

كەڭەس قورىتىندىسى بويىنشا مينيستر مارات قارابايەۆ ۋچاسكەلەردى ماقساتسىز قولدانۋ جاعدايلارىن بولدىرماۋ ماقساتىندا اۆتوموبيل جولدارىن رەكونسترۋكتسيالاۋ ءۇشىن جەرلەردى الدىن الا رەزەرۆكە قويۋ جونىندە تاپسىرما بەردى.