استانا پوليتسياسىنا ءىز-ءتۇزسىز جوعالعاندار تۋرالى 4 مىڭعا جۋىق ارىز تۇسكەن

None
استانا. قازاقپارات - جىل باسىنان بەرى ءىز- ءتۇزسىز جوعالعاندار تۋرالى 4 مىڭعا جۋىق ارىز تۇسكەن، دەپ حابارلايدى قازاقپارات استانا قالاسى پوليتسيا دەپارتامەنتىنىڭ باسپا ءسوز قىزمەتىنە سىلتەمە جاساپ.

استانا قالاسى پوليتسيا دەپارتامەنتى كريمينالدىق پوليتسيا باسقارماسىنىڭ قىزمەتكەرلەرى ىزدەۋدە جۇرگەن 54 جاستاعى ەلوردا تۇرعىنىن تاپتى. بۇعان دەيىن پوليتسياعا 77 جاستاعى انا مەديتسينالىق مەكەمەدە ەسەپتە تۇرعان ۇلىنىڭ جوعالىپ كەتكەنى تۋرالى ارىزدانعان. ەلوردالىق ءتارتىپ ساقشىلارى ەرىكتىلەرمەن بىرگە ءىز- ءتۇزسىز جوعالعان ادامدى ىزدەۋگە جۇمىلدىرىلىپ، بارلىق ماڭاي تەكسەرىلدى. جەدەل ىزدەستىرۋ شارالارى بارىسىندا ەر ادام «شارىن» بازارىنىڭ اۋماعىنان تابىلدى. قازىرگى ۋاقىتتا ول ۇيىندە، جاعدايى قالىپتى.

ايتا كەتسەك، جىل باسىنان بەرى پوليتسياعا ازاماتتاردىڭ، ونىڭ ىشىندە بالالاردىڭ ءىز- ءتۇزسىز جوعالۋى تۋرالى 3 669 ارىز تۇسسە، جوعالعانداردىڭ كوپشىلىگى 24 ساعات ىشىندە تابىلىپ، قالعاندارىنىڭ ورنالاسقان جەرى ىزدەستىرۋ شارالارى بارىسىندا انىقتالعان.

سوڭعى جاڭالىقتار