استانا ورتالىعىنداعى 4 كوشەگە ءبىرجاقتى قوزعالىس ەنگىزبەك

استانا. قازاقپارات - ەلوردادا تاعى بىرنەشە كوشە ءبىرجاقتى قوزعالىسقا اۋىستىرىلۋى مۇمكىن. بۇل تۋرالى استانا قالاسىنىڭ كولىك جانە جول-كولىك ينفراقۇرىلىمىن دامىتۋ باسقارماسىنىڭ باسشىسى جانسۇلتان ساپاربايەۆ ءمالىم ەتتى، دەپ حابارلايدى قازاقپارات ءتىلشىسى.

«تاۋەلسىزدىك داڭعىلى مەن ءال-فارابي كوشەسىن جالعايتىن كوپىر پايدالانۋعا بەرىلسە، ماڭگىلىك ەل داڭعىلىنا جۇكتەمە ازايادى دەپ كۇتەمىز. كوپىردى قازان ايىنىڭ سوڭىندا نەمەسە قاراشانىڭ باسىندا ىسكە قوسۋ جوسپارلانىپ وتىر. سونداي-اق قازىر اكىمشىلىك پوليتسيا باسقارماسىمەن بىرلەسىپ جۇمىس جۇرگىزىپ جاتىرمىز. دوستىق، قونايەۆ، تۇركىستان جانە اقمەشىت كوشەلەرىنە ءبىرجاقتى قوزعالىستى ەنگىزۋ ماسەلەسى قارالىپ جاتىر. ءبىراق ول ءۇشىن اتالعان كوشەلەردى ورتاشا جوندەۋ قاجەت. ياعني، سارايشىق كوشەسىن كەڭەيتۋگە تۋرا كەلەدى»، - دەدى جانسۇلتان ساپاربايەۆ قالالىق ءماسليحاتتىڭ وتىرىسىندا.

باسقارما باسشىسىنىڭ ايتۋىنشا، كوشەلەرگە ءبىرجاقتى قوزعالىس ەنگىزۋ الدىمەن زەرتتەلەدى جانە ول قوعامنىڭ تالقىسىنا شىعارىلادى.

«تاۋەلسىزدىك كوپىرىن ىسكە قوسقاننان كەيىن بۇل ماسەلەگە قايتا ورالامىز. جاڭا كوپىردىڭ قالاداعى جول قوزعالىسىن قانشالىقتى جەڭىلدەتىنىن بايقاۋ كەرەك»، - دەيدى ول.