تۇركياداعى جول اپاتىنان زارداپ شەككەندەر اراسىندا 4 اتىراۋلىق بار

اتىراۋ وبلىسى اكىمىنىڭ ورىنباسارى جاسۇلان بيسەمبيەۆتىڭ ايتۋىنشا، تۇركياداعى جول اپاتىنان زارداپ شەككەندەر اراسىندا 4 اتىراۋلىق بولعان.
«جول اپاتىنان جارالانعانداردىڭ ىشىندە تورتەۋى - اتىراۋلىق. ۇشەۋى الانيا مەملەكەتتىك اۋرۋحاناسىندا، ال ءبىر ناۋقاس سيدە اناتوليا اۋرۋحاناسىندا جاتىر. ءبىر ناۋقاس جانساقتاۋ بولىمىندە، ءۇش ناۋقاستىڭ جاعدايى ورتاشا اۋىر، دارىگەرلەردىڭ باقىلاۋىندا ءتيىستى ەمىن الۋدا. قازىرگى تاڭدا وبلىستىق اكىمدىك پەن دەنساۋلىق ساقتاۋ باسقارماسى اتالعان اۋرۋحانا دارىگەرلەرىمەن تىعىز بايلانىستا»، - دەپ حابارلادى جاسۇلان بيسەمبيەۆ.
ەسكە سالا كەتەلىك، بۇدان بۇرىن الانيادا قازاقستاندىق تۋريستەر مىنگەن اۆتوبۋس جۇك كولىگىنە سوعىلىپ، 2 ادام كوز جۇمعانى حابارلانعان ەدى.
تۇركيانىڭ الانيا قالاسى اۋماعىندا تۋريستەر مىنگەن شاعىن اۆتوبۋس جۇك كولىگىمەن سوقتىعىستى. سالدارىنان ەكى ادام كوز جۇمىپ، تاعى 12 ادام زارداپ شەكتى. جولاۋشىلار اراسىندا قازاقستاندىقتار بولعان. اۋىر جاراقات العان 6 ادام الانيا مەن ماناۆگات اۋداندارىنىڭ اۋرۋحانالارىنا جەتكىزىلگەن.
كەيىن ەكى قازاقستاندىق تۋريسكە وتا جاسالعانى جازىلعان بولاتىن.
سىرتقى ىستەر مينيسترلىگىنىڭ مالىمەتىنشە، تۇركيانىڭ الانيا اۋماعىندا بولعان جول اپاتىنان ەكى قازاقستاندىق جاراقات العان. ولارعا وتا جاسالعان.
سونداي- اق، اۋىر جاراقات العان قازاقستاندىق تۋريست قايتىس بولعانى حابارلاندى.
«الانياداعى اپاتتان زارداپ شەككەن جولاۋشىلاردىڭ ءبىرى بۇگىن تاڭەرتەڭ اۋىر جاراقات سالدارىنان اۋرۋحانادا قايتىس بولدى. قازا تاپقان قر ازاماتىنىڭ ۇلى بۇگىن انتالياعا كەلدى جانە قازىر ءبىزدىڭ ديپلوماتتارمەن بىرگە. وعان بۇكىل قاجەتتى كومەك كورسەتىلەدى»، - دەپ جازىلعان ق ر س ءى م حابارلاماسىندا.