التاي كولگىنوۆ: 4 بالا تۋعان ايەلدى زەينەتكە ەرتە جىبەرۋ انالاردىڭ وزىنە ءتيىمسىز
«قازىرگى تاڭدا زەينەتاقىمەن قامتاماسىز ەتۋدىڭ ءۇش دەڭگەيى دە (ىنتىماقتى، بازالىق، جيناقتىق) ەڭبەك وتىلىنە بايلانعان. ايەلدەردىڭ زەينەتكە شىعۋ جاسى - 61. 1998-جىلى جيناقتىق زەينەتاقى جۇيەسىنە كوشكەندىكتەن، زەينەتكە ەرتە شىعۋ جەڭىلدىكتەرى جويىلعان بولاتىن.
الەۋمەتتىك كودەكس اياسىندا 5 جانە ودان دا كوپ بالا دۇنيەگە اكەلگەن (اسىراپ العان) جانە 8 جاسقا دەيىن تاربيەلەپ وسىرگەن، 1998-جىلعا دەيىنگى ەڭبەك ءوتىلى بار ايەلدەرگە جاسىنا بايلانىستى زەينەتكە 53 كە كەلگەندە شىعۋ جەڭىلدىگى ساقتالعان.
ال 1998-جىلدىڭ 1- قاڭتارىنان بەرگى ەڭبەك ءوتىلى ءۇشىن جيناقتاۋشى زەينەتاقى قورىنا مىندەتتى جارنا تولەپ تۇرعان جاعدايدا جيناقتىق زەينەتاقى تولەنەدى. ىنتىماقتى زەينەتاقى تولەمىن دە، بازالىق تولەمدى دە تاعايىنداۋ ءۇشىن ەڭبەك ءوتىلى جاس بالانىڭ كۇتىمىنە جۇمىستان بوساتىلعان كەزدە باستاپ ەسەپتەلەدى. ءبىراق ول مەرزىم ءار بالانىڭ 3 جاسىنان اسپاۋى كەرەك جانە جالپى جيىنتىعى 12 جىلدان كوپ بولماۋى كەرەك. بۇل پەرزەنتىنىڭ كۇتىمىنە بايلانىستى جۇمىس ىستەمەگەن ايەلدەرگە ەڭبەك وتىلىنەن ۋاقىت جولعاتپاۋعا مۇمكىندىك بەرەدى»، - دەپ تۇسىندىرەدى ۆيتسە-پرەمەر.
سونداي-اق، ول كوپبالالى انالارعا 53 جاستان زەينەتكە شىعۋ جىل سايىن ءتيىمسىز بولىپ كەلە جاتقانىن ايتادى.
«وسىلايشا ىنتىماقتى زەينەتاقى 5 جانە ودان دا كوپ بالا تۋعان (اسىراپ العان) جانە ولاردى 8 جاسقا دەيىن تاربيەلەگەن ايەلدەرگە 53 جاسقا كەلگەندە تاعايىندالادى. ال بازالىق زەينەتاقى 61 گە كەلگەندە بارىپ قوسىلادى.
بۇگىندە ىنتىماقتى زەينەتاقىنىڭ مولشەرى جاڭادان زەينەتكە شىققاندار ءۇشىن جىل سايىن تومەندەپ كەلەدى. ونىڭ ورنىن 1998-جىلدان بەرى مىندەتتى جارنا رەتىندە اۋدارىلعان جيناقتاۋشى زەينەتاقى تولتىرىپ وتىرۋى كەرەك. ياعني، مىندەتتى زەينەتاقى جارناسىن اۋدارعان جىلداردىڭ سانى نەعۇرلىم كوپ بولسا، بازالىق زەينەتاقى مولشەرى دە سوعۇرلىم جوعارى بولادى. وسىنىڭ ءبارىن ەسكەرسەك، 4 بالا تۋعان انالارعا زەينەتكە ەرتە شىعۋ قۇقىعىن بەرۋ ولاردى زەينەتاقىمەن اقىلعا قونىمدى دەڭگەيدە قامتۋعا مۇمكىندىك بەرمەيدى»، - دەلىنگەن جاۋاپتا.
