ەكى جىلدا «اڭساعان ءسابي» باعدارلاماسى بويىنشا 4 مىڭ نارەستە دۇنيەگە كەلدى
بۇل تۋرالى «اشىق» ن ق ا پورتالىندا جاريالاعان 2030-جىلعا دەيىن انا مەن بالا دەنساۋلىعىن ساقتاۋ قىزمەتىن دامىتۋ تۇجىرىمداماسىندا جازىلعان، دەپ حابارلايدى قازاقپارات ءتىلشىسى.
«2020-جىلى مەملەكەت باسشىسى ءوزىنىڭ «جاڭا جاعدايداعى قازاقستان: ءىس-قيمىل كەزەڭى» اتتى قازاقستان حالقىنا جولداۋىندا ەلدەگى وتباسىلىق-دەموگرافيالىق احۋال زور الاڭداۋشىلىق تۋدىرىپ وتىرعان ماسەلە ەكەنىن ايتىپ، ۇكىمەتكە ە ك ۇ كۆوتانى 7 ەسە ۇلعايتۋدى تاپسىردى. وسىعان بايلانىستى مينيسترلىك 2021-جىلدان باستاپ جىل سايىن وتباسىلىق جۇپتارعا ە ك ۇ جۇرگىزۋگە 7000 كۆوتا بەرۋمەن «اڭساعان ءسابي» ارناۋلى باعدارلاماسىن ىسكە اسىرۋدا. وسى باعدارلامانىڭ ىسكە اسىرىلۋى كەزەڭىندە (2021-2022-جىلدارى) 14000 ايەل كۆوتا الدى. ناتيجەسىندە 3300 وتباسىندا 4000 ءسابي دۇنيەگە كەلدى، شامامەن 2500 ايەل جۇكتىلىگى بويىنشا قارالۋدا»، - دەلىنگەن مينيسترلىك اقپاراتىندا.
بۇعان دەيىن حابارلاعانىمىزداي، الداعى 7 جىلعا ارنالعان انا مەن بالا دەنساۋلىعىن ساقتاۋ قىزمەتىن دامىتۋ تۇجىرىمداماسى ازىرلەندى.
تۇجىرىمداما 24- مامىرعا دەيىن كوپشىلىك تالقىلاۋدا بولادى.