شەتەلدىك بيزنەسمەندەر قازاقستان بيۋجەتىنە 4 ميلليارد تەڭگەدەن استام قارىز - سەناتور
سەناتور اندرەي لۋكين دەپۋتاتتىق ساۋالىندا بيزنەس-يمميگرانتتاردىڭ قارجىلىق بۇزۋشىلىقتارى مەن قارىزدارى تۋرالى ايتتى، دەپ حابارلايدى قازاقپارات.
«بيزنەس- يمميگرانتتاردىڭ ۆيزاسىز 198 كومپانياسىندا 4 ميلليارد تەڭگە بەرەشەگى بار. 1,5 مىڭنان استام كومپانيا تىركەۋ ورنىندا جوق جانە 2 مىڭعا جۋىق فيرما جۇمىس ىستەمەيدى. بۇل تولىق دەرەك ەمەس. مەملەكەتتىك كىرىستەر ورگاندارى زاڭدى تۇلعانى قۇرۋ كەزىندە زاڭنامالىق بۇزۋشىلىقتارعا جول بەرۋىنە بايلانىستى ونى تاراتۋ جولىمەن تالاپ قويۋعا قۇقىلى. زاڭدى تۇلعانى قۇرعان شەتەلدىكتىڭ بيزنەس-يمميگرانت ۆيزاسىن الماۋى وسىنداي بۇزۋشىلىقتىڭ ءبىرى بولىپ تابىلادى. الايدا، رەسپۋبليكالىق ماڭىزى بار وبلىستار مەن قالالاردا بەلگىلەنگەن زاڭدى تۇلعانىڭ مەملەكەتتىك تىركەۋدەن ءوتۋىن تانۋ شارالارى جالپىعا بىردەي قولعا الىنباعان»، - دەدى سەناتور.
حالىققا قىزمەت كورسەتۋ ورتالىعى قىزمەتكەرلەرى شەتەلدىكتەردىڭ بيزنەس-يمميگرانت ۆيزاسى بولماسا دا، زاڭدى تۇلعانى تىركەۋدەن وتكىزۋدى جالعاستىرۋ فاكتىلەرى قيىندىق تۋعىزىپ وتىر. وعان سالالىق نورماتيۆتىك اكتىلەردەن باس تارتۋ ءۇشىن نەگىزدەردىڭ بولماۋى سەبەپ بولىپ وتىر.
«قالىپتاسقان جاعداي شەتەلدىك ازاماتتاردىڭ كۇماندى زاڭدى تۇلعا قۇرۋىنا ىقپال ەتەدى، ولار كەيىننەن قارجىسىن كولەڭكەلى اينالىمعا شىعارۋ سحەمالارىندا قولدانۋى ابدەن مۇمكىن. وسىعان بايلانىستى، بيزنەس- يمميگرانتتارعا سالىق سالۋ جانە كوشى-قون ماسەلەلەرى بويىنشا ۆەدومستۆولىق باقىلاۋدى كۇشەيتۋدى، بۇكىل ەل بويىنشا بيزنەس-يمميگرانتتاردىڭ تىكەلەي قاتىسۋىمەن سالىق تولەمدەرى مەن زاڭدى قىزمەت جۇرگىزۋ تۇرعىسىندا كومپانيالار مەن فيرمالارعا اۋديتورلىق تەكسەرۋلەر جۇرگىزۋدى، سونداي-اق بيزنەس-يمميگرانتتارمەن قۇقىقتىق قاتىناستاردى رەتتەۋ تەتىگىن جەتىلدىرۋ جونىندە زاڭنامالىق تۇزەتۋلەرگە باستاماشىلىق جاساۋدى ۇسىنامىن»، - دەدى دەپۋتات.
