جاڭاوزەندەگى جارىلىستان قازا بولعاندار سانى 4 كە جەتتى

استانا. قازاقپارات - جاڭاوزەندە گاز جارىلعان ۇيدەن 11:45 تە ۇيىندىلەردىڭ استىنان ايەل ادامنىڭ دەنەسى شىعارىلدى، دەپ حابارلايدى ق ر ت ج م باسپا ءسوز قىزمەتى.

قۇتقارۋشىلار ۇيىندىلەردەن تاعى ءۇش ادامدى تىرىدەي الىپ شىقتى: ەر ادام، ايەل ادام جانە ءبىر بالا.

قازىرگى جاعداي بويىنشا قۇتقارۋشىلار ۇيىندىلەردىڭ استىنان 4 امان قالعان ادام مەن 4 ادامنىڭ دەنەسىن الىپ شىقتى.

قۇتقارىلعانداردى جانە مەديتسينالىق كومەككە جۇگىنگەندەردى قوسقاندا بارلىعى 8 ادام اۋرۋحاناعا جاتقىزىلدى.

ۇيىندىلەردى تالداۋ بويىنشا جەدەل جۇمىستارعا 40 قا جۋىق تەحنيكا مەن 350 گە جۋىق ادام جۇمىلدىرىلدى: قۇتقارۋشىلار، ونىڭ ىشىندە كينولوگيالىق ەسەپتوپ، ۇلتتىق ۇلاننىڭ اسكەري قىزمەتشىلەرى، جەرگىلىكتى اتقارۋشى ورگاندار، جەدەل مەديتسينالىق كومەك، پوليتسيا، ەرىكتىلەر.

«11:45 تە ۇيىندىلەردىڭ استىنان ايەلدىڭ دەنەسى الىپ شىعارىلدى. وسىلايشا، قازىرگى كەزدەگى جاعداي بويىنشا ۇيىندىلەردىڭ استىنان 4 امان قالعان ادام مەن 4 ادامنىڭ دەنەسى الىپ شىعارىلدى. 6 ادام اۋرۋحاناعا جاتقىزىلدى» دەلىنگەن حابارلامادا.

ۇيىندىلەردى ارشۋ جۇمىستارى جالعاسۋدا.

ايتا كەتەيىك، بۇعان دەيىن اپات كەزىندە قازا بولعاندار سانى 3 ادامعا جەتكەنىن جازعان ەدىك.