اسكەري قىزمەت اتقارۋ كەزىندە باسشىعا قارسىلىق تانىتقاندار 4 جىلعا سوتتالۋى مۇمكىن
بۇل تۋرالى اشىق تالقىعا شىعارىلعان «ق ر كەيبىر زاڭنامالىق اكتىلەرىنە قىلمىستىق، قىلمىستىق- پروتسەستىك جانە قىلمىستىق-اتقارۋ كودەكستەرىن وڭتايلاندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىندا جازىلعان، دەپ حابارلايدى قازاقپارات ءتىلشىسى.
«باستىققا، سول سياقتى وزىنە جۇكتەلگەن اسكەري قىزمەت مىندەتىن ورىندايتىن وزگە ادامعا قارسىلىق كورسەتۋ نەمەسە ونى وسى مىندەتتەردى بۇزۋعا كۇش قولدانۋ نەمەسە ونى قولدانۋ قاتەرىن ءتوندىرۋ ارقىلى ماجبۇرلەۋ – 200 ايلىق ەسەپتىك كورسەتكىشكە دەيىنگى مولشەردە ايىپپۇل سالۋعا نە سول مولشەردە تۇزەۋ جۇمىستارىنا نە 50 تاۋلىككە دەيىنگى مەرزىمگە قاماققا الۋعا جازالانادى. ال وسىنداي ارەكەتتەر ارقىلى باسشىنىڭ دەنساۋلىعىنا ورتاشا اۋىرلىقتاعى زيان كەلتىرسە، وندا كىنالى 4 جىلعا دەيىن باس بوستاندىعىنان ايىرۋ جازاسىمەن جازالانادى»، - دەلىنگەن جاڭا رەداكسيادا.
سونىمەن قاتار، جاڭا وزگەرىسكە ساي، اسكەري قىزمەتتى اتقارۋ كەزىندە باستىققا زورلىق-زومبىلىق كورسەتكەندەرگە دە ءدال وسىنداي جازا قولدانىلادى. قازىرگى زاڭنامادا مۇنداي نورمالار جوق.
قۇجات 23-قاڭتارعا دەيىن اشىق تالقىلاۋدا بولادى.
اۆتور
ءاليحان اسقار
