قازاقستاندىقتار 4 پايىزبەن اۆتوكولىك الۋدا نەنى ءبىلۋى ءتيىس؟
ارتىنشا بىرنەشە اۆتوكرەديت راسىمدەلگەننەن كەيىن 14- شىلدەدە بانكتەر اۆتونەسيە بەرۋدى توقتاتتى. بۇعان دەيىن بيىل قاراشادان باستاپ ءوتىنىم قابىلداۋ باستالۋى مۇمكىن ەكەنى حابارلانعان بولاتىن.
قازاقستاندىقتار اسىعا كۇتىپ جۇرگەن باعدارلاما تۋرالى نە ءبىلۋ كەرەك؟
Massaget.kz ءتىلشىسى انىقتاپ كوردى.
قازاقستانداعى جەڭىلدەتىلگەن اۆتونەسيە شارتتارى قانداي؟
باعدارلاما شارتى بويىنشا، كەز كەلگەن قازاقستاندىق 4 پايىزبەن نەسيەگە 10 ميلليون تەڭگەدەن اسپايتىن باعاعا كولىك الا الادى. باستاپقى جارنا 0 پايىزدان باستالادى. نەسيە 7 جىلعا دەيىن بەرىلەدى. جالپى جەڭىلدەتىلگەن اۆتونەسيەگە 100 ميلليارد تەڭگە جۇمساۋ جوسپارلانىپ وتىر.
10 ميلليون تەڭگەدەن قىمبات كولىك تاڭداۋعا بولا ما؟
باعدارلاما بويىنشا 10 ميلليون تەڭگەگە دەيىن نەسيە قاراستىرىلعان. ال كولىك 10 ميلليوننان قىمبات بولسا، 1-2 ميلليوندى ءوز قالتاڭىزدان تولەپ، نەسيە راسىمدەۋگە بولادى. وتە قىمبات كولىكتەرگە جەڭىلدەتىلگەن اۆتونەسيە بەرىلمەيدى. كولىك قۇرالىنىڭ قۇنى 15 ميلليون تەڭگەدەن اسپاۋى ءتيىس. بۇل تۋرالى يندۋستريا جانە ينفراقۇرىلىمدىق دامۋ ۆيتسە-ءمينيسترى مارات قارابايەۆ ايتقان.
نەسيە كىمگە جانە قانداي شارتتار بويىنشا بەرىلەدى؟
جەڭىلدەتىلگەن اۆتونەسيەنى راسىمدەۋ ءۇشىن قازاقستان رەسپۋبليكاسىنىڭ ازاماتى بولۋى كەرەك. كليەنتتىڭ جاسى 21 دەن اسۋى قاجەت. تۇراقتى ايلىق تابىسى رەسمي دالەلدەنۋى مىندەتتى. ءاربىر ەكىنشى دەڭگەيلى بانك ءوز كليەنتىن جەكە قارايتىنىن بىلگەن دۇرىس. ونىڭ ىشىندە تۇتىنۋشىنىڭ نەسيە تاريحى، تابىس كوزى جانە تاعى دا باسقا شارتتار مىندەتتى تۇردە قارالادى.
باعدارلاما بويىنشا قانداي كولىك ماركالارى بار؟
نەگىزى جەڭىلدەتىلگەن اۆتونەسيە بويىنشا مىنا كولىكتەر تۇسەدى: Chevrolet, Hyundai, Škoda، JAC، KIA، Lada جانە Renault. دەگەنمەن، بۇل كولىكتەردىڭ بارلىق ماركاسى قولجەتىمدى ەمەس، وسىنىڭ ىشىندە 10 ميلليوننان اسىپ كەتپەيتىنى عانا ساۋدادا بولادى. قازىر الەمدىك ەكونوميكالىق احۋالعا بايلانىستى كوپتەگەن كولىك باعدارلامادان شىعىپ قالۋى مۇمكىن.
ازىرگە 10 ميلليون تەڭگەگە دەيىنگى جەڭىلدىكپەن اۆتونەسيەلەۋدىڭ جاڭا باعدارلاماسى بويىنشا ساتىپ الۋعا بولاتىن اۆتوكولىكتەر ءتىزىمى مىناداي:
جەڭىلدەتىلگەن اۆتونەسيەنى قانشا قازاقستاندىق الدى؟
ساراپشى ءارى تاۋەلسىز اۆتوموبيليستەر وداعىنىڭ (ت ا و) ءتوراعاسى ەدۋارد ەدوكوۆ Tengrinews.kz تىلشىسىمەن اڭگىمە بارىسىندا ورتاشا ستاتيستيكالىق قازاقستاندىقتىڭ جەڭىلدەتىلگەن اۆتونەسيە باعدارلاماسىنا قاتىسۋ مۇمكىندىگىن باعالاعان بولاتىن.
«ءبىر قاراعاندا، بولىنگەن 100 ميلليارد عاجايىپ سوما بولىپ كورىنۋى مۇمكىن. شىندىعىندا، ءبىر قازاقستاندىققا ورتا ەسەپپەن 10 ميلليون تەڭگە بولىنەتىنىن ەسكەرسەك، بۇل باعدارلاما 10 مىڭعا جۋىق كولىككە عانا جەتەدى. قازاقستانداعى كولىكتەرگە دەگەن سۇرانىسقا كەلەر بولساق، بىلتىر نارىقتا 120 مىڭ جاڭا كولىك، وعان قوسا، مەنىڭ ويىمشا، 500-600 مىڭداي ەسكى كولىك ساتىلدى. وسى 10 مىڭ كولىك قازاقستاندىقتاردىڭ كولىككە دەگەن ناقتى سۇرانىسىن قاناعاتتاندىرا الا ما؟»، - دەگەن ەدى ساراپشى.
سوڭعى مالىمەتتەر بويىنشا، 100 ميللياردتىڭ 90 ميلليارد تەڭگەسىنە نەسيە بەرىلگەن. باعدارلاما اياسىندا 11825 ءوتىنىم قابىلدانعان.
باعدارلاما كولىككە دەفيتسيتتى ارتتىرىپ جىبەرمەي مە؟
ەدۋارد ەدوكوۆ انونسقا دەيىن قازاقستاندا اۆتوسالونداردا كولىك الۋعا دەگەن كەزەك كوپ بولعانىن ەسكە سالدى. ونىڭ ويىنا، باعدارلاما قوسىلسا اۆتوكولىك الۋ ودان دا قيىنداي تۇسەدى.
«ەنەرگيا تاسىعىشتار مەن مەتال باعاسىنىڭ ءوسۋى، ەلەكتر چيپتەرىنىڭ تاپشىلىعى، لوگيستيكا ماسەلەلەرى، پاندەميادان كەيىنگى افتەرشوكتار - مۇنىڭ ءبارى بۇكىل الەم بويىنشا اۆتوموبيل وندىرىسىندەگى وسى نەگىزگى پروبلەمالاردىڭ بارلىعى ەشقايدا كەتكەن جوق، ال وعان ەندى كولىكتەردىڭ اي سايىن باعاسى ءوسىپ، تاپشى بولاتىنى دا قوسىلادى»، - دەيدى ول.
جەڭىلدەتىلگەن كولىك نەسيەسى نە ءۇشىن كەرەك؟
قارجىگەر نۇرمۇحامەد مامانوۆ Tengrinews.kz تىلشىسىنە بەرگەن سۇحباتىندا نەسيەنىڭ بۇل ءتۇرى ەسكىرگەن كولىك ۇلەسىن ازايتۋ ءۇشىن قاجەت ەكەنىن ايتقان.
«جەڭىلدەتىلگەن اۆتونەسيە قازاقستان نارىعىنا كەرەك باستى مەحانيزمدەردىڭ ءبىرى ەكەنى بەلگىلى. نەگە دەسەڭىز، ونىڭ ارقاسىندا ەلىمىزدىڭ كولىك نارىعىنداعى بىرنەشە ماسەلەنى وڭاي شەشۋگە بولادى. مىسالى، قازاقستانداعى 100 كولىكتىڭ 64 ءى ەسكىرگەن، ياعني بۇل ءوز كەزەگىندە ەكولوگيانىڭ ناشارلاۋىنا جانە جول اپاتىنىڭ كوبەيۋىنە اكەلىپ سوعادى. ەندى وسى ەسكى كولىكتەردىڭ نارىقتاعى ۇلەسىن ازايتۋ ءۇشىن جەڭىلدەتىلگەن اۆتونەسيە باعدارلاماسى تاپتىرماس مۇمكىندىك بولىپ تۇر»، - دەيدى ول.
