قازاقستاندا كولىكپەن جولاۋشى تاسىمالداۋ 4 پايىزعا قىمباتتادى
Finprom.kz پورتالىنىڭ مالىمەتىنشە، وسى جىلدىڭ ءبىرىنشى جارتىجىلدىعىندا اۆتوكولىك جانە قالالىق ەلەكتر كولىگى كاسىپورىندارىنىڭ كىرىسى 192,5 ميلليارد تەڭگەگە جەتتى. بۇل وتكەن جىلمەن سالىستىرعاندا 40,8 پايىزعا كوپ. ونىڭ ىشىندە شامامەن 137,3 ميلليارد تەڭگە جۇك تاسىمالىنان، 55,1 ميلليارد تەڭگە جولاۋشى تاسىمالىنان، 68,1 ميلليارد تەڭگە جۇرگىزۋشىلەرى نەمەسە ەكيپاجى بار كولىك قۇرالدارىن ليزينگكە بەرۋدەن ءتۇستى.
كولىك تۇرلەرى بويىنشا تابىس:
- جۇك اۆتوكولىگىنەن 137,3 ميلليارد تەڭگە (اقشامەن ەسەپتەگەندە 47,6 پايىز ءوسىم)؛
- اۆتوبۋستارمەن تاسىمالداۋدان 49,4 ميلليارد تەڭگە (%28,9+)
- تاكسي قىزمەتى ەسەبىنەن 2,2 ميلليارد تەڭگە (%1,9+)؛
- ترامۆايمەن تاسىمالداۋ ەسەبىنەن 952,6 ميلليون تەڭگە (%13,2+)؛
- تروللەيبۋسپەن تاسىمالداۋ ەسەبىنەن 942,7 ميلليون تەڭگە (%26,3+).
وڭىرلەر اراسىندا ەڭ كوپ جولاۋشىلار تاسىمالى الماتى قالاسىندا تىركەلدى. وندا 884,3 ميلليون ادام تاسىمالداندى. ودان كەيىنگى ورىندا قوستاناي مەن پاۆلودار وبلىستارى تۇر.
جولاۋشىلار تاسىمالى ەڭ از وڭىرلەر - ماڭعىستاۋ، ۇلىتاۋ جانە قىزىلوردا وبلىستارى. سونداي- اق ءمالىم ەتىلگەندەي، بيىلعى جىلدىڭ ماۋسىم ايىندا اۆتوكولىكپەن جولاۋشىلار تاسىمالداۋ باعاسى وتكەن جىلمەن سالىستىرعاندا 4 پايىزعا قىمباتتادى.
باعانىڭ ەڭ جوعارى ءوسۋى الماتى وبلىسىندا (%9,8+) بايقالدى. ودان كەيىنگى ورىنداردا تۇركىستان (%8,5+) جانە قوستاناي (%6,2+) وبلىستارى تۇر.
